Əlillərə hansı avtomobillər verilir? - Rəsmi cavab
Əmək və Əhalinin Sosial Müdafiəsi Nazirliyi tərəfindən imtiyazlı kateqoriyadan olan şəxslərə postmüharibə dövründə 567, ümumilikdə ötən dövrdə isə 7,8 min avtomobil təqdim edilib.
Bu barədə MİNA tv.az-ın sorğusuna cavab olaraq Sosial Xidmətlər Agentliyindən məlumat verilib.
Bildirilib ki, hazırda əlillərə təqdim edilən avtomobillər Azərbaycanda istehsal olunan “Xəzər” markalı avtomobillərdir.
“Müharibə və 20 Yanvar hadisələri, habelə Çernobıl AES-də hərbi xidmətlə əlaqədar əlilliyi olan şəxslər Əmək və Əhalinin Sosial Müdafiəsi Nazirliyi tərəfindən minik avtomobili ilə təmin olunurlar”.
Agentlikdən verilən məlumata görə, 2024-cü ildə bu təminat üçün növbədə olan bütün imtiyazlı şəxslərin avtomobillə təminatı tam şəkildə yekunlaşdırılıb.
Qeyd edilib ki, növbəti mərhələdə avtomobilə tibbi göstəriş veriləcək şəxslərin də təminatı həyata keçiriləcək.
