HARINLAMIŞ “HƏKİM”LƏRDƏN QORUNUN!


Müstəqil Azərbaycanın səhiyyə sistemində ikitirəlik yaranandan bəri ölkə vətəndaşlarına tibbi xidmət də bərbad hala düşüb – desək, yəqin ki, yanılmarıq. Bu mövzuda redaksiyamıza ünvanlanan şikayətlər də dediklərimizi təsdiqləyir.
Müstəqil İctimai Nəzarət Agentliyinin MİNA tv.az saytına ərizə ilə müraciət edən 2009-2013-cü illərin ikiqat Dünya və Avropa çempionu, Novruz Xudiyev bildirir ki, “Azərbaycanın üçrəngli bayrağını beynəlxalq arenalarda dövlət himnimizin sədaları altında dəfələrlə zirvələrə qaldırmışam. Həmin yarışlar zamanı aldığım zərbələrdən qarın nahiyəmdə əmələ gəlmiş qasıq yırtığı (qrıja) bir müddət sonra məni incitməyə başlayanda, akademik Mirqasımov adına Respublika Klinik Xəstəxanasının və Azərbaycan Tibb Universitetinin Cərrahiyyə Mərkəzinin həkimi, özünü cəmiyyətə Azərbaycan və Rusiya Tibb Akademiyasının əvəzsiz professoru kimi təqdim edən Fariz Camalova müraciət etdim. O, 2021-ci və 2024-cü illərdə məni üç dəfə cərrahi əməliiyat elədi. Birinci dəfə qarın nahiyəmin aşağı hissəsində etdiyi əməliyyat nisbətən normal alınsa da, göbək nahiyyəmdən etdiyi sonrakı iki əməliyyat tam uğursuz oldu. Belə ki, F.Camalovun məni axırıncı dəfə etdiyi əməliyyatdan bir neçə ay keçməmiş kəskin ağrılar məni çox incitməyə başladı və yenidən ona müraciət etməli oldum. O isə məni müayinə etdikdən sonra gülə-gülə bildirdi ki, “get hazırlaş, səni yenidən əməliyyat edəcəm!” Buna görə aramızda mübahisə də oldu. Əməliyyatlardan sonra onun bütün tapşırıqlarına əməl etsəm də, məni şərləməyə başladı ki, “özünü hardasa gücə salmısan”. Halbuki, həmişə özümü ağır işlərdən qorumuşdum. Hətta məşqçilik fəaliyyətimi də dayandırmış, yetirmələrimi başqa məşqçi dostlarıma həvalə etmişdim. Ancaq həkim keçirdiyi əməliyyatların uğursuz alınmasında məni günahlandırdı. Odur ki, başqa xəstəxanada daha gənc bir cərraha müraciət etdim və uğurla əməliyyat olundum. Bu sonuncu əməliyyat zamanı məlum oldu ki, F.Camalov öncəki əməliyyatlarımda ucuz və keyfiyyətsiz torlardan və sorulmayan saplardan istifadə etməklə məni özündən daimi asılı vəziyyətə salmışdır.
Artıq başqa həkimin etdiyi sonuncu əməliyyatdan bir aya yaxın vaxt keçir. Özümü yaxşı hiss etsəm də, həkimlər bildirirlər ki, artıq idmanla məşğul olmağa və uşaqlara mməşq keçməyə yararsızam. Eyni yerdən üç dəfə olunduğuma görə, hətta mənə pensiya da təyin olunmalıdır. Deməli F.Camalov mənim idmançı karyeramı məhv edib.
Son vaxtlar sosial şəbəkələrdən mənə o da məlum olub ki, F.Camalov yalnız məni deyil, çox adamı şikəst edib. Özünüz F.Camalovun profil səhifəsinə nəzər salsanız görərsiniz ki, onun əməliyyat etdiyi şəxslərdən ölənlər də çox olub. Onu baytar həkimi, qəssab, cəllad, qatil və s. adlandıranlar da çoxdur.
Hörmətli redaksiya, yuxarıdakı qeydlərimlə Sizə müraciət etməkdə məqsədim odur ki, ötən əsrdən qalma metodlarla işləyən bu sovet “professor”unun tibbi bacarıqsızlığını ictimailəşdirəsiniz ki, digər xəstələr də onun cəncəlinə keçməsinlər. Digər tərəfdən onun mənə vurduğu maddi və mənəvi zərərin ödənilməsi üçün vəkillə təmin olunmağıma köməklik göstərəsiniz”
P,S. Şikayət ərizəsində hallandırılan faktlara aydınlıq gətirmək və sayt üçün obyektiv material hazırlamaq məqsədilə F.Camalova zəng etdik. O isə, faktlara normal münasibət bildirmək əvəzinə, “Mən elə xəstə tanımıram. Niyə mənə sən deyib tərbiyəsizlik edirsiniz?”-deyə elə hay-həşir qopardı ki, məəttəl qaldıq. Və dərhal da telefonu tərbiyəsizcəsinə söndürdü. Obyektivlik naminə F.Camalovun profil səhifəsinə nəzər saldıq. Şikayətçinin ərizədə göstərdiyi faktlar öz təsdiqini tapdı. Odur ki, şikayət ərizəsini nöqtə-vergülünə toxunmadan ictimailəşdirdik və məktub formasında aidiyyəti dövlət orqanlarına ünvanladıq ki, məsələyə hüquqi qiymət verilsin!
Özünüzü harınlamış “həkim”lərdən qoruyun!

MİNA tv.az saytının Araşdırma Bürosu