Moskvada miqrantlar üçün “rəqəmsal qolbaq” sistemi işə düşür
Rusiya paytaxtında miqrant nəzarəti yeni, sərtləşdirilmiş mərhələyə keçir.
MİNA tv.az xəbər verir ki, Moskva meri ilə FSB-yə yaxın mənbələrə istinad edən rusiyalı insayder kanallarının məlumatına görə, şəhər hakimiyyəti ölkəyə daxil olan hər bir miqrantdan DNT nümunəsi, fotoşəkil, barmaq izləri götürəcək və onların smartfonlarına 24 saatlıq izləmə imkanı verən xüsusi proqram yükləyəcək.
Yeni sistem miqrantın geolokasiyasını, hərəkət marşrutlarını və əlaqə qurduğu şəxsləri avtomatik izləyəcək, sosial şəbəkələrdəki fəaliyyətləri, paylaşılan fotolardan tutmuş “bəyənmə”lərə qədər analiz edəcək.
Suriya ilə, yaxud radikal hesab edilən hər hansı qrupla bağlı “şübhəli” like və ya şərh ölkəyə girişin rədd edilməsinə və ya hüquq-mühafizə orqanlarının çağırılmasına səbəb ola bilər.
Mənbələr qeyd edir ki, Moskva bu layihənin ilk pilot regionu olacaq. Əgər sistem səmərəli hesab edilərsə, modelin bütün Rusiya üzrə tətbiqi planlaşdırılır.
Bu hadisə ölkədə miqrasiya nəzarətinin kəskin şəkildə sərtləşdirilməsi istiqamətində ciddi addımların atıldığını göstərir.
