Günaydın, dəyərli xanımlar və bəylər! Müstəqil İctimai Nəzarət Agentliyinin votsap qrupunun üzvlərini və xalqımızı səmimi salamlayıram.

Öncə sözügedən qrupun yaradılmasında mənim təşəbbüsümə ilk dəstək verən və inzibati işləri öhdəsinə götürüb operativ şəkildə təşkil edən dəyərli şairimiz Vidadi Ağdamlıya və onun dəvətilə ictimai nəzarətə təşrif buyuran hər bir ziyalımıza təşəkkürlərimi bildirirəm. Ardınca isə ümumi tanışlıq üçün mənim kimliyim və agentliyimizin yaradılması tarixi və hazırki fəaliyyəti, eləcə də gələcək işlərimiz, məqsəd və məramımız barədə qısa məlumat vermək istəyirəm.

Mən Yaqub Məğrur Xudiyev 11 kitab müəllifi və 22 almanax və antologiya həmmüəllifiyəm. 1994-cü ildən Azərbaycan mətbuatının müxtəlif orqanlarında müxtəlif vəzifələrdə çalışmışam. 2000-2001-ci və 2008-2010-cu illərdə “Şəhidlər”, 2004-2024-cü illərdə “Təhqiqat” adlı ictimai-siyasi, hüquq qəzetlərinin baş redaktoru olaraq fəaliyyət göstərmişəm. 24.05.2023-cü il tarixdə MİNA Tv,az saytını təsis etmiş və qeydiyyatdan keçirmişəm. Son bir il ərzində ölkə ərazisində baş vermiş qanun pozuntuları ilə əlaqədar saytda dərc etdiyimiz obyektiv məqalə və reportajlara görə dəfələrlə məmur hücumlarına məruz qalmışıq. Hətta sözügedən məqalə və reportajları saytdan çıxarmadığımız halda məhkəməyə veriləcəyimizlə bağlı hədələrlə üzləşsək də, hamısına qanuni yollarla sinə gərmişik. Ancaq etiraf edim ki, xalqın dəstəyi olmadan cəmiyyətdə tüğyan edən qanunsuzluqlara və məmur özbaşınalıqlarına qarşı mübarizə aparmaq çox çətinləşib. Odur ki, ölkə prezidentinin çıxışlarında da qeyd edildiyi kimi ictimai nəzarətin güclənməsi zərurəti yaranıb. Müstəqil İctimai Nəzarət Agentliyinin yaranması da bu zərurətdən qaynaqlandı.

MİNA-nin qərargahı Azərbaycan Nəşriyyatının 6-cı mərtəbəsində yerləşir. Agentlik üzvləri vəsiqə və tanıdıcı döş nişanları ilə təmin ediləcəklər. Üzvlərin vəzifəsi isə AR Konstitusiyasından irəli gələn qanunlar əsasında fəaliyyət göstərmək, MİNA-nin nüfuzunu qorumaqla rəhbərliyin təyin etdiyi monitorinq, toplantı və yığıncaqlarda iştirak etmək və verilən tapşırıqları yerinə yetirmək, cəmiyyətdə qarşılaşdıqları qanunsuzluqlara laqeyd qalmamaq, faktlara operativ və obyektiv yanaşmaqla qanuni tədbir görülməsinə nail olmaq, bu mümkün olmadıqda isə dərhal aidiyyəti üzrə yuxarı orqanlara məlumat verməkdən ibarətdir.

Xalqın düşdüyü indiki ağır durumdan çıxmasına dəstək istiqamətində hər birinizə uğurlar arzulayıram.
Hörmətlə,
MİNA-nin rəhbəri:
Yaqub Məğrur
18.09.2024 cü il