Bu gün SOCAR-ın Bakı Ali Neft Məktəbinin (BANM) yaradılmasından 14 il ötür. MİNA tv.az-ın məlumatına görə, Azərbaycan Prezidenti İlham Əliyevin 29 noyabr 2011-ci il tarixli Fərmanı ilə SOCAR-ın strukturunda Bakı Ali Neft Məktəbi yaradılıb.

Bakı Ali Neft Məktəbinin hər cür şəraiti olan bir kampus binası və bir korpusu istifadəyə verilib.

Bakı Ali Neft Məktəbi hazırda Azərbaycanda ən yüksək keçid balına malik ali təhsil müəssisəsi kimi fərqlənir.

BANM Prezident təqaüdçülərinin sayına görə bir neçə ildir ardıcıl olaraq liderliyini qoruyur və bu il 36 Prezident təqaüdçüsü ilə rekordunu yeniləyib.

Hazırda Bakı Ali Neft Məktəbi 9 ixtisas üzrə bakalavr, 8 ixtisaslaşma üzrə magistratura və 3 ixtisas üzrə doktorantura səviyyələrinə qəbul aparır.

İlk illər yalnız I ixtisas qrupu üzrə qəbul həyata keçirilsə də, son illər II ixtisas qrupunun Biznesin idarəedilməsi ixtisasında da qəbul aparılır və bu il ilk dəfə II ixtisas qrupu üzrə Maliyyə ixtisasına qəbul həyata keçirilib, İlk dəfə qəbul həyata keçirilməsinə baxmayaraq, bu qrup üzrə Prezident təqaüdçüsü olan 25 tələbənin məhz 12-si bu yeni açılmış ixtisasın tələbəsi olub.

Bu il BANM-in təşəbbüsü ilə Azərbaycanda ilk dəfə Data analitikası ixtisasına qəbul həyata keçirilib. İlk il olmasına baxmayaraq, bu ixtisas da ən yüksək bal toplayan abituriyentlərin seçimi olub.

Dövlət Məşğulluq Agentliyinin statistikasına görə, 2025-ci il üzrə məzunları ən çox iş tapan TOP 5 universitet siyahısında Bakı Ali Neft Məktəbi liderdir.

Bakı Ali Neft Məktəbi dünya universitetləri arasında 801–1000-ci yerlərdə qərarlaşıb.

Bakı Ali Neft Məktəbinin tərkibində artıq Rəqəmsal Biliklər Liseyi fəaliyyətə başlayıb.