20 Yanvar Ümumxalq Hüzn və Milli Qurtuluş Günümüzdür
Müstəqil Azərbaycanın qəhrəmanlıq tarixinə ən qanlı qırğınlardan biri kimi düşən 20 Yanvar 1990-cı il faciəsini hər il Ümumxalq Hüzn Günü kimi qeyd edirik.
Məhz o gün qırmızı sovet faşizminin zərsifət siyasətinə qarşı həmrəylik nümayişilə etiraz edən xalqımız vəhşicəsinə qanına qəltan edilsə də, cəmi bir il sonra milli müstəqilliyinə nail oldu. Ölkəmizi işğal edən dünyanın ən güclü ordusuna, hətta əliyalın müqavimət göstərən qəhrəman xalqımız 147 şəhid versə də, ümumilikdə iki əsr davam edən Rusiya əsarətinə son qoymaqla azadlığa qovuşdu.
Milli müstəqilliyimiz və müqəddəs torpaqlarımız uğrunda özlərini qurban verən bütün
Şəhidlərimizə Allah qəni-qəni rəhmət eləsin!
Milli istiqlalımız əbədi var olsun!
ŞƏHİDLƏR
İyirmi Yanvarın qış gecəsində,
Tarixə imzalar atdı Şəhidlər.
Toplaşıb Bakının hər küçəsində,
İstiqlal yolunu tutdu Şəhidlər.
Azadlıq diləndi təpərləriylə,
Meydana girdilər sipərləriylə.
Qaniçən rus sovet kafərləriylə,
Çarpışıb al-qana batdı Şəhidlər.
Xalqımın qüruru coşdu qanında,
Susmadı hiyləgər düşmən yanında.
Müqəddəs Şəhidlər Xiyabanında,
Uyuyub əbədi yatdı Şəhidlər.
İstiqlal savaş inadlarında,
Ölməzlik qazandı son adlarında.
Müqəddəs ruhların qanadlarında,
Ən uca məqama çatdı Şəhidlər.
Yaqub Məğrur
26.01.1990 - 20.01.2026
