Xəbər verdiyimiz kimi, Prezident Administrasiyasının idarəçiliyində olan “Azərbaycan” nəşriyyatı artıq əsaslı təmirə dayanma ilə bağlı qapılarını qıfıllama günlərini yaşayır. Redaksiyalara isə fevralın 27-dək nəşriyyatı tamamilə tərk etmək göstərişi verilib. Lakin uzun illər boyu icarədə olmuş bir sıra redaksiyaların jurnalist kollektivləri alternativ yer problemi üzündən çətin durumla üzləşiblər. Bu günə nəzərdə tutulmuş toplantıda da bu məsələlər müzakirə edildi.
Toplantıda bu barədə danışan “Təzadlar” qəzetinin baş redaktoru Asif Mərzili jurnalistlərə sevindirici xəbəri çatdırdı. Sitat: “…Az əvvəl Mətbuat Şurasının sədri Rəşad Məcidlə söhbətimiz oldu, sağ olsun diqqət göstərir və yaranmış problemdən çıxış yolları axtarılır. Bizim bu toplantımız etiraz aksiyası yox, aidiyyəti dövlət qurumlarından müvəqqəti yerləşmək üçün alternativ məkan verilməsi xahişli toplantıdır. Müzakirəmizlə bir daha aidiyyəti dövlət qurumlarının rəhbərlərinə üzümüzü tutaraq xahiş edirik: mediaya bu çətin günlərdə yiyə durun! Cənab Prezident mediaya lazımi qədər dəstək verir, köməklik olunur, lakin indi bəzi məmurlar nədən bu dəstəyi davam etdirməsinlər? Biz müstəqil media orqanlarının əməkdaşları 30-40 ildir nəşriyyatın icarəsində fəaliyyət göstərmişik, külli miqdarda icarə haqqı ödəmişik. İndi necə ola bilər ki, bizləri bayıra atıb “gedin, başınızı saxlayın!” deyilir? Bu müraciətimizlə bir daha cənab Prezident İlham Əliyevə müraciət edərək düşdüyümüz çıxılmaz vəziyyətlə əlaqədar kömək istəyirik. Ötən aydan təmir adı ilə boşaldılacaq “Azərbaycan” nəşriyyatında yerləşən redaksiyalara alternativ yer verilmədiyindən, jurnalistlər arasında ciddi narahatlıqlar yaranmışdır, onların peşə fəaliyyəti pozulmaqdadır. Biz iki həftə əvvəl nəşriyyatın qarşısında dinc toplantı keçirərək ölkə rəhbərliyindən kömək istəmişdik. Prezident Administrasiyası səsimizə dərhal reaksiya verdi və bizi Azərbaycan Mətbuat Şurasına dəvət etdilər. Şuranın sədri hörmətli Rəşad Məcidlə geniş müzakirəmiz oldu, o da vəziyyətimizi düzgün qiymətləndirərək kömək ediləcəyini qeyd etdi, təkliflərimizi diqqətə çatdırdıq. Bu gün də eyni məzmunda müzakirəmiz oldu, dünən də danışmışıq… Təkliflərimiz iki həftə olar Prezident Administrasiyasına göndərilib, cavab gözləyirik. Lakin bu cavab hələ də yubadılır. Axı kifayət qədər boş ərazilər var, 5-10 redaksiyaların əməkdaşlarını yerləşdirmək nə böyük problemə çevrilib? İnanırıq ki, bu dəfə və ən yaxın günlərdə problem həllini tapacaq”.

“…Biz nəşriyyatdan tələm- tələsik çıxarılan redaksiyaların xahişi budur ki, nəşriyyatın əsaslı təmiri dövründə müvəqqəti olaraq başqa bir ofis yeri verilsin, binanı tərk edən redaksiyalar əsaslı təmir işləri başa çatdıqdan sonra əvvəlki iş yerlərinə geri qaytarılsın, buna şərait yaradılsın… Və inanırıq ki, uzun illər ərzində “Azərbaycan” nəşriyyatında icarədə olmuş, indiyədək külli miqdarda icarə haqqı ödəmiş media subyeklərinə bu çətin və məsuliyyətli dönəmdə rəsmi qurumlar lazımi köməklik göstərəcəklər”,-deyə Asif Mərzili çıxışını yekunlaşdırdı.
Toplantıda çıxış edən “”Yenixeber.org” portalının rəhbəri İlqar Salmanov, “Gündəmxeber.org” saytının rəhbəri Şirin Cəfərli və başqaları da eyni məzmunlu çıxışları ilə aidiyyəti dövlət qurumlarından dəstək gözlədiklərini qeyd etdilər.
Beləliklə, junalistlər tezliklə problemin həllinə çarə tapılacağına ümid edirlər.(Tezadlar.az)
Elçin Məmmədli