Bu gün plastik cərrahiyyə sahəsində narazılıqlar artıq istisna deyil, demək olar ki, gündəlik müzakirə mövzusuna çevrilib. Uğursuz əməliyyatlar, sağlamlıq fəsadları və gözləntiləri doğrultmayan nəticələr pasiyentlərin şikayətlərini artırır. Bəzi hallarda həkimlərin məsuliyyətə cəlb edildiyini görsək də, bu, problemin köklü həll olunduğu anlamına gəlmir. Əksinə, hər gün yeni şikayətlərin gündəmə gəlməsi vətəndaşlarda haqlı sual yaradır: plastik əməliyyat etdirmək istəyən şəxs etibarlı həkimi necə tapsın və düzgün seçim etsin?

Milli Məclisin Səhiyyə komitəsinin üzvü, deputat Müşfiq Məmmədli MİNA tv.az-a açıqlamasında bildirib ki, ümumiyyətlə, istənilən halda həkim müraciəti ilkin səhiyyə xidməti vasitəsilə olmalıdır.

Onun sözlərinə görə, ilkin səhiyyə xidmətinə müraciət etdikdən sonra artıq müvafiq həkimə yönləndirmə, prosedurların həyata keçirilməsinə istiqamət verilmə daha dolğun həyata keçirilir:

"Amma təbii ki, indi hal-hazırda bizim vətəndaşlar müxtəlif istiqamətlər seçirlər. Reklamı aparılan özəl klinikalar və ya özəl klinikalarda çalışan, televiziya reklamlarında tez-tez görünən müxtəlif ixtisas sahibləri arasında bu hal xüsusilə plastik cərrahiyyə sahəsində daha qabarıq şəkildə özünü göstərir. Amma bunlar son nəticədə obyektiv olmayan, bəzən isə narahatlıq yaradan məqamlarla müşahidə olunur. Ona görə də burada ən mühüm, ən önəmli məsələ doğru-düzgün istiqaməti seçməkdir. Doğru-düzgün istiqamət isə dediyimiz kimi, ilkin səhiyyə xidməti, tibb müəssisəsinə müraciət və tibb müəssisəsinə müraciət əsasında müvafiq istiqamətlərin müəyyənləşməsidir.

545358Bundan sonra isə həqiqətən də, həkimin ixtisasını müəyyənləşdirən sertifikatının olması, bu sahədə mütəxəssis olması və klinikanın da bu sahə üzrə uyğunlaşmış olmasını artıq özləri üçün müəyyənləşdirdikdən sonra müvafiq əməliyyatlara əgər tibbi göstəriş ehtiyac olarsa, müraciət etməlidir".