Bakıdakı tunellər niyə yuyulmur? - RƏSMİ AÇIQLAMA
Moskva prospekti-20 Yanvar küçəsinin kəsişməsində yerləşən “Şamaxinka tuneli”nin divarlarında aparılan kimyəvi təmizləmə işlərinin görüntüləri sosial şəbəkələrdə geniş müzakirələrə səbəb olub.
Kadrlarda tunelin illər ərzində toplanan kir və toz qatından rəngini itirdiyi, xüsusi yuma prosesi tətbiq edildikdən sonra isə divarların ilkin görünüşünə qayıtdığı əks olunub.
MİNA tv.az məsələ ilə əlaqədar olaraq Azərbaycan Avtomobil Yolları Dövlət Agentliyinə (AAYDA) sorğu ünvanlayıb.
Sorğumuza cavab olaraq bildirilib ki, tunellərin, körpülərin və keçidlərin yuyulması prosesi hər il yaz-yay aylarında planlı şəkildə həyata keçirilir.
“Payız və qış aylarında bu işlərin görülməsi məqsədəuyğun deyil, çünki yağışlı hava şəraitində divarlar ertəsi gün yenidən palçıq və tozla örtülür. Nəqliyyat vasitələrinin intensiv hərəkəti zamanı təkərlərin arxasınca qalxan palçıq və toz dənəcikləri divarlara hopur”.
Agentlik tərəfindən yayılan görüntülərlə bağlı məsələyə isə aydınlıq gətirilərək qeyd edilib ki, həmin şəxs istifadə etdiyi yuyucu vasitənin reklamını aparır. Bildirilib ki, həmin şəxs divar və kafel səthlərini, eləcə də avtonəqliyyat vasitələrinin disklərini təmizləmək üçün bu maddədən istifadə edir:
“Bu, sadəcə yuyucu vasitənin reklamıdır. Burada qeyri-adi heç nə yoxdur. Hər il yay aylarında bu yuyulma işləri həyata keçirilir. Bakı tozlu şəhərdir və payız yağışlarından sonra divarların üzərində tozun hopması prosesi daha da sürətlənir. Nəticədə yayılan görüntülərdəki kimi mənzərə formalaşır”, - AAYDA məlumatında deyilir.
