Faktlar dəlillərlə təsdiqləndiyi halda polis orqanları vətəndaşların tapdalanmış hüquqlarının bərpasına niyə biganə yanaşırlar?

Saytımıza daxil olan şikayət ərizələri araşdırılarkən, göstərilən faktlar dəlillərlə təsdiqləndiyi halda, hüquqi qiymət verilməsi məqsədilə tərəfimizdən aidiyyəti hüquq mühafizə orqanlarına ünvanlanır. Ancaq təəssüflər olsun ki, əksər hallarda polis orqanları şikayətçi talelərinə biganə yanaşır, vətəndaşları “mülki iş” adıyla məhkəmə orqanlarına yönləndirməklə başdansovdu cavablar verir və bununla da işlərini bitmiş hesab edirlər. Ona görə də belə məsələlərdən bir neçəsini ictimailəşdirmək qərarına gəldik.

13.12.2024-cü il tarixdə Qobupark Yaşayış Kompleksində məskunlaşmış şəhid övladı Salahov Elşad Əsgər oğlundan, Qarabağ Savaşı Qaziləri Qəhrəmanaov Müseyib Zəka oğlundan və Xudiyev Novruz Yaqub oğlundan saytımıza daxil olan ərizələrdə bildirilirdi ki, Lökbatan qəsəbəsinin girişində yerləşən “Xəyalservis” avtomobil təmiri müəssisəsində “dəmirçi-malyar ustası” işləyən Muradov Nahid Yadigar oğlu onların avtomobillərinin təmiri və rənglənməsi üçün hər birindən ayrı-ayrılıqda razılaşma əsasında müəyyən qədər - ümumilikdə 4370 (dörd min üç yüz yetmiş) manat məbləğdə nağd pul vəsaitlərini aldığına baxmayaraq, işi keyfiyyətsiz yerinə yetirmiş, üstəlik uşağının xəstələndiyini bəhanə gətirərək əlavə borc pul alıb daimi yaşayış yeri olan İmişli rayonunun Yalavac kəndinə getmiş, ancaq bir daha geri qayıtmayıb. Telefon zənglərimizə də cavab vermir.

Bu üç məcburi köçkünün etibarından sui-istifadə edərək 4370 manat pul vəsaitini mənimsəyən N.Muradovun əməlinə hüquqi qiymət verilməsi məqsədilə sözügedən ərizələri 17.12.2024-cü il tarixdə Qaradağ Rayon Polis İdarəsinin 10-cu Polis Şöbəsinin rəisi cənab polkovnik Sabir Həsənova ünvanlamışdıq. Uzun müddət məktubumuza cavab verilmədiyinə görə sözügedən şöbə ilə əlaqə saxlayıb faktla əlaqədar aparılan işlə maraqlandıq. Məlum oldu ki, məsələnin araşdırılması təhqiqatçı əvəzinə sahə müvəkkili kapitan Seymur Musayevə həvalə edilib. Bir həftə sonra isə S.Musayev məzuniyyətə çıxdığına görə işi Qasım adlı sahə rəisinə ötürüb. Qasım da şikayətçilərin ifadələrini almaqla işini bitmiş hesab edib. Nəhayət Seymur məzuniyyətini başa vurub işə qayıdandan sonra, guya araşdırmanı yekunlaşdırıb rəisə təhvil verib. Rəis S.Həsənovun 05.01.2025-ci ildə imzaladığı, ancaq nədənsə təqribən iki ay sonra - 03.03.2025-ci il tarixdə saytımıza ünvanlandığı cavab məktubunda isə deyilir:

- ”...Müraciətinizlə bağlı polis şöbəsində müvafiq araşdırma aparılmışdır. Aparılan araşdırma zamanı müraciətinizdə qeyd olunan xüsusatların mülki xarakterli olduğu müəyyən edilmişdir. Mülki mübahisələrlə bağlı mülki iddia qaydasında aidiyyəti üzrə məhkəmə orqanlarına müraciət etmək hüququnuz vardır. Odur ki, müraciətinizdə qeyd olunmuş xüsusatların mülki xarakterli olduğunu nəzərə alaraq, toplanmış materialın polis şöbəsinin dəftərxanasında işə alınması məqsədə müvafiq hesab edilir.”
Səhlənkarlığın dərəcəsinə baxın! Vətəndaşların taleyinə belə biganə yanaşmaq olarmı, cənab rəis?

16.12.2024-cü ildə isə Güzdək kənd sakini Heydərov Zahir Fərəməz oğlunun MİNA Tv.az saytına daxil olmuş şikayət ərizəsi əsasında apardığımız jurnalist araşdırması zamanı göstərilən faktlar təsdiqini tapdığına görə saytımızda “Mən heç kimdən qorxmuram!-deyən polis atası polis orqanlarını itxana adlandırır?” başlıqlı material dərc edilmişdi. Üstəlik zərər vuran şəxsin törətdiyi əmələ hüquqi qiymət verilməsi məqsədilə sözügedən şikayət ərizəsi və digər təsdiqləyici şahid ifadələri 27.12.2024-cü il tarixdə tərəfimizdən Daxili İşlər Naziri general-polkovnik cənab Vilayət Eyvazova göndərilmişdi. 13.01.2025-ci il tarixdə AR DİN Baş İstintaq və Təhqiqat İdarəsinin rəis müavini Emin Məmmədovun imzasilə aldığımız cavab məktubunda bildirilir ki, “...Zahir Heydərovun pulunun mişar daşı satılması ilə bağlı Səxavət Hüseynov və qeyriləri tərəfindən ələ keçirilməsi barədə şikayəti üzrə Abşeron RPİ-nin İstintaq Şöbəsində araşdırma aparılaraq əməldə cinayət tərkibi olmaması əsası ilə AR Cinayət Prosessual Məcəlləsinin 39.1.2. maddəsinə əsasən cinayət işinin başlanmasının rədd edilməsi haqqında qərar qəbul olunmuşdur... ...Müraciətiniz cinayət prosessual qanunvericiliyinin tələblərinə əsasən qəbul edilmiş qərarın əsaslılığının yoxlanılması üçün ibtidai araşdırmaya prosessual rəhbərliyi həyata keçirən Abşeron rayon prokuroruna göndərilmişdir.”

Açığı, DİN-dən belə cavab gözləmirdik. Çünki Z.Heydərovun şikayət ərizəsində göstərilən faktlar dəlillərlə öz təsdiqini tapdığı və ona 3760 (üç min yeddi yüz altmış) manat borclu olan Hüseynov Səxavət polis orqanlarını saymazyana və təhqiranə şəkildə “itxana” adlandırdığı halda nazirlik səviyyəsində belə cavab verilməsi qəribədir, deyilmi?

P.S. Hər iki şikayət ərizəsində AR Cunayət Məcəlləsinin 178-ci maddəsinin tərkib hissəsində göstərilən əməllər törədildiyi halda, polis orqanları sözügedən şikayət ərizələrində göstərilən faktlara hansı əsasla biganə yanaşırlar? Məgər bilmirlərmi ki, hazırda məhkəmədə bir iddia qaldırmaq üçün vəkilə 500 (beş yüz) manat pul ödəmək, yuxarıda sözügedən məcburi köçkünlərin imkanları xaricindədir? Polis orqanlarının zərərçəkmişlərin şikayətlərinə biganə yanaşması dələduzlara dəstək olunması və zərərçəkmişlərin itirdikləri vəsaitləri geri qaytarmaq üçün nəticəsi mücərrəd olan uzun müddətli məhkəmə prosesindən vaz keçməklə qanunsuz zorakılığa təhdid edilməsi anlamına gəlmirmi? Axı vətəndaşların hüquqlarını tapdalamış dələduzlara qarşı zor tətbiq etmələrinin, dəfələrlə həbslə nəticələnməsi hallarının da şahidi olmuşuq.

Asayişi qorumaq beləmi olur, cənablar!
MİNA Tv.az-ın Araşdırma Bürosu