Qobupark Yaşayış Kompleksindən MİNA tv.az saytına 13 dekabr 2024-cü il tarixdə daxil olmuş ərizələrdə QYK-1 və QYK-2-də yaşayan məcburi köçkünlər Qəhrəmanov Müseyib Zəka oğlu, Salahov Elşad Əsgər oğlu və Xudiyev Novruz Yaqub oğlu bildirirlər ki, “Lökbatan qəsəbəsinin girişində yerləşən “Xəyal” adlı dairədə fəaliyyət göstərən “Xəyalservis” avtomobil təmiri müəssisəsində dəmirçi-malyar işləyən Muradov Nahid Yadigar oğlu, onların avtomobillərinin təmiri və rənglənməsi üçün hər birindən ayrı-ayrılıqda müəyyən qədər pul vəsaitlərini nağd aldığına baxmayaraq, işi keyfiyyətsiz yerinə yetirmiş, üstəlik uşağının xəstələndiyini bəhanə gətirərək əlavə borc pul alıb ailəsinin yaşadığı İmişli rayonunun Yalavac kəndinə yola düşüb, ancaq geri qayıtmayıb. Onu axtarmağımızın səbəbi isə, təmirdən sonra avtomobillərimizi yudurdarkən Nahidin vurduğu rənglərin qabarıb tökülməsidir. Ona zəng edəndə isə, ya cavab vermir, ya da verdiyi üç telefon nömrəsinin heç birinə zəng çatmır. Odur ki, Nahidin işlək əlaqə nömrəsini axtararkən, onu yaxından tanıyan bir şəxslə tanış olduq. O, Nahidin arvadının nömrəsini bizə verdi. Həmin nömrəyə zəng edib şikayət edəcəyimizi bildirəndə isə, Nahidin arvadı yalvara-yalvara söz verdi ki, şikayət etməsəniz Nahidin sizdən aldığı pulları yaxın vaxtlarda kartınıza köçürəcəm. Amma o da əri kimi bizi xeyli müddət aldadandan sonra, ümumiyyətlə zənglərimizə cavab vermədi və hətta votsapda yazışmalarımıza da son qoydu. Odur ki, Nahidin bizə vurduğu maddi və mənəvi zərəri - ümumilikdə 4370 (dörd min üç yüz yetmiş) manat məbləğində pul vəsaitini geri almaq üçün, bizi ələ salan bu iki ər-arvadın kimliyini ictimailəşdirməklə ifşa etmək qərarına gəldik. Xahiş edirik ki, bu işdə bizə köməklik göstərəsiniz.”
Araşdırma apararkən şikayət ərizələrində göstərilən faktlar öz təsdiqini tapdı. Hətta zəngimizə, özünü Nərminə kimi təqdim edən Nahidin həyat yoldaşı əri ilə bizi telefonla əlaqələndirəcəyinə söz versə də, bir daha telefon zənglərimizə cavab vermədi.
Odur ki, sözügedən şikayət ərizələrini qanuni tədbir görülməsi və N.Muradovun məcburi köçkünlərə qarşı törətdiyi əməllərə hüquqi qiymət verilməsi məqsədilə aidiyyəti üzrə Qaradağ Rayon Polis İdarəsinin 10-cu Polis Şöbəsinə göndərdik. Hüquq Mühafizə Orqanı tərəfindən görülən tədbirlər barədə izləyicilərə məlumat veriləcək.

MİNA tv.az-ın Araşdırma Bürosu