2018-ci ildə istifadəyə verilən Qobu Park yaşayış Kompleksinə köçürülərkən sevinclərinin həddi-hüdudu olmayan məcburi köçkünlərin bir çox problemləri var idi ki, ötən altı il ərzində hələ də həllini tapmamış qalır. Kütləvi işsizlik, maddi imkansızlıq, keyfiyyətsiz tikilmiş mənzil, vaxtaşırı sönən işıq, limiti kifayət etməyən qaz, içməli su əvəzinə verilən texniki su problemləri və s.

Müzəffər ordumuzun qələbəsi sayəsində doğma yurdlarına pənah aparacaqları günü səbirsizliklə gözləyən ahıl yaşlı insanların hökumətin verdiyi cüzi miqdarda təqaüd hesabına sürünmələri və orta yaşlı məcburi köçkünlərin adambaşına düşən altmış manat kompensasiya pulu hesabına ailə yükünü çəkə bilməmələri fonunda, işsizlik ucbatından ailənin ərzaq və digər qida məhsulları ilə təmin edilməsi üçün qazanc əldə etmək məqsədilə paytaxtın küçə-bazarlarında ən çirkli işlərdə çalışmağa məcbur olan ali təhsilli gənc oğlan və qız-gəlinlərin aciz durumu, alayarımçıq istifadəyə verilmiş mənzillərin təmir işlərinə əlavə pul vəsaitlərinin bank kreditləri hesabına ödənilməsi, elektrik enerjisinin vaxtaşırı kəsilməsilə əlaqəli mənzillərə verilən suyun da dərhal kəsilməsi, üstəlik mənzillərə texniki su verilməsi səbəbindən içməli suyun da dükanlardan maddi vəsait hesabına alınması, limiti başa çatandan sonra əlavə işlədilmiş hər kub.metr qaza görə ikiqat haqq ödənilməsi və s. Qobu Park sakinlərinin vəziyyətini daha da ağırlaşdırır.
Qeyd edilən bu və digər problemlərin həlli istiqamətində edilən şikayətlərə, əlaqədar dövlət orqanlarının laqeydliyi isə lap dözülməz həddə çatıb. Belə ki, bu qədər ağır duruma düşən insanlara kömək etmək harınlamış məmurların heç veclərinə də deyil. “Pulun var gəl, pulun yox öl!” prinsipilə işləyən səlahiyyət sahibləri, hətta qulluq mövqeyindən sui-istifadə edir, imkansızlıq ucbatından ödənişləri edə bilməyən məcburi köçkünləri məhkəmə yolu ilə sındırmağa da cəsarət edirlər ki, başqalarına da dərs olsun.
Üç yaşayış massivindən ibarət Qobu Park Yaşayış Kompleksində zillət içində sürünən 13871 nəfər sakinlər arasında ayrı-seçkilik salınması da məmur bivecliyinin göstəricisidir. Buna başqa nə ad vermək olar ki, yuxarıda sadalanan problemlər içində çabalayan insanlar arasında nəyinsə müqabilində fərq qoyasan?
Yaxın günlərdə Qobupark-2 sakini Novruz Xudiyev redaksiyamıza müraciət edərək şikayətləndi ki, “ümumilikdə Qobu Park sakinləri arasında “Azərsu”ya borcu olmayan ailə yoxdur. Elə ailələr var ki, borc məbləği 400-500 manatı ötüb. Mənim də 250 manat borcum var idi. İmkan düşdükcə hissə-hissə ödəyirdim. Ancaq nədənsə, “Azərsu” Qaradağ rayon məhkəməsində yalnız mənim barəmdə məhkəmə iddası qaldırıb hissə-hissə ödəniş barədə qərəzli “Qətnamə” çıxartdırdı. Məhkəmə icraçısı Orxan Göyüşlü isə məni bütöv ödəniş etməyə məcbur elədi. O qədər pulum olmadığına görə yaxın dostlarımdan 250 manat borc alıb məhkəmə icra şöbəsinə ödəməyə vadar oldum.”
Şikayətlə əlaqədar “Azərsu” ASC-nin mətbuat xidmətçisi Anar Cəbrayıllıya zəng etdik. Ancaq dəfələrlə etdiyimiz zəngə cavab verilmədi. Qaradağ rayon Su-Kanal İdarəsinin rəisi Sultan Əmiraslanovu aramaq cəhdlərimiz də fayda vermədi. Rəis müavini İzmir Əmirov “Nə üçün 400-500 manat borcu olan abonentlər dura-dura, yalnız 250 manat borcu olan Novruz Xudiyevin borc məsələsi məhkəmə müstəvisinə qaldırılıb?”-sualımızı cavablandıra bilmədiyinə görə, sözügedən məsələ ilə əlaqədar məhkəmə iddiası qaldıran “Azərsu” ASC-nin hüquqi nümayəndəsi Gülşad Ağayevə zəng etdi. G.Ağayev isə rəis müavininin üzünə dedi ki, “siz dediniz, mən də yerinə yetirdim”. Sonra biz də G.Ağayevə zəng edib eyni sualı ona da ünvanladıq. O isə müxtəlif bəhanələrlə hər vəchlə sualımızı cavablandırmaqdan yayındı. Qaradağ rayon İcra-probasiya Şöbəsinin icraçısı Orxan Göyüçlü isə “Nə üçün məhkəmə hissə-hissə ödəniş edilməsi barədə qətnamə çıxardığı halda, imkansız vətəndaşı tam ödəniş etməyə məcbur etmişiniz?”- sualımızı operativ cavablandırmaq əvəzinə, “siz kimsiniz ki, mənə belə sual verirsiniz?”-deyə reketfason qısa cavabla telefonu qapatdı. Odur ki, məsələni ictimailəşdirmək qərarına gəldik. Sual yenə açıq qalır. Hesab edirik ki, ictimailəşəndən sonra yəqin ki, saytımıza rəsmi cavab verilər.
P.S. Qobu Park Yaşayış Kompleksində mənzillərə “içməli su” adıyla verilən texniki suyun nə vəziyyətdə olduğunu özündə əks etdirən və müxtəlif vaxtlarda su filtrləri dəyişdirilərkən çəkilmiş foto-şəkilləri izləyicilərə təqdim edirik. Bu barədə daha geniş materialı növbəti sayımızda yayımlayacayıq.

MİNA tv.az-ın Araşdırma Bürosu