Son günlər MİNA tv.az-a daxil olan ərizələri araşdırarkən, şikayətlərdən biri bizi daha çox təəccübləndirdi. Güzdək kənd sakini Heydərov Zahir Fərəməz oğlu ərizəsində bildirirdi ki, “təqribən bir il yarım öncə Hüseynov Səxavət adlı şəxs oğlu Turalla birlikdə 11 (on bir) Kamaz mişar daşı daşıtdırsa da, mənə borclu olduqları ümumilikdə 5660 manat pulun 1900 manatını ödəsə də, qalan 3760 manatını verməkdən imtina edir. Hətta Səxavət, ondan polisə şikayət etdiyimə görə deyir ki, nə qədər ki, sən itxanaları gəzib məndən şikayət edirsən, daha sənə bir qəpik də pul verməyəcəm. Mən heç kimdən qorxmuram.”
Doğrusu şikayətçinin dediklərinə inanmağımız gəlmədi. Hesab etdik ki, oğlu polisdə işləyən ata polis orqanlarını itxana adlandırmaz. Odur ki, qarşı tərəfin mövqeyini öyrənmək məqsədilə gün ərzində S.Hüseynova bir neçə dəfə zəng etdik. Ancaq onun telefonuna zəng çatmadığına görə, polisdə işləyən oğlu Tural Hüseynova zəng etdik. Özünü Yasamal RPİ-nin polis serjantı kimi təqdim edən Tural deyilənləri etiraf edərək bildirdi ki, evi sadtığa qoymuşuq ki, Zahir Heydərovun borcunu ödəyək. Elədirsə bir il yarım ərzində niyə borcunuzu ödəməmisiniz?-sualımıza Tural cavab verdi ki, hələ ev satılmayıb. Bəs atanızın polis orqanlarını itxana adlandırması barədə nə deyə bilərsiniz?-sualımıza isə Tural cavab verdi ki, atam elə şey deməz, Zahir atama şər atır.” Bu barədə yazılı məlumat verməsini xahiş edəndə isə Tural razılaşdı və yarım saata redaksiyamıza gələcəyini bildirdi. Ancaq bir saatdan sonra bizə zəng edib məlumat verdi ki, hazırda hansısa hüzr yerinə getməli oldu və sabah saat 10-11 arası gələcəyini bildirdi. Razılaşdıq. Ancaq Tural dediyi vaxtda nə gəlmədi, nə də zəng etmədi. Odur ki, biz zəng edəndə isə Tural bildirdi ki, rəhbərlik mətbuata gəlməyimə icazə vermir.
Bu barədə şikayətçiyə məlumat verəndə isə, o, faktın təsdiq edilməsi üçün iki nəfər şahidi redaksiyaya gətirdi. Və hər iki şahid Zahirin dediklərini nöqtə-vergülünə qədər təsdiqlədilər. Odur ki, şikayətçinin xahişilə məsələni ictimailəşdirdik.
Şikayət ərizəsində göstərilən faktlar şahid ifadələrilə təsdiqləndiyinə görə, hadisəyə hüquqi qiymət verilməsi məqsədilə toplanmış materialları aidiyyəti dövlət orqanlarına ünvanlayırıq. Görülən qanuni tədbirlər barədə saytımızda əlavə məlumat veriləcək.

MİNA tv.az-ın Araşdırma Bürosu