Qaradağ rayonunun Lökbatan qəsəbəsi yaxınlığında yerləşən Qobu Park Yaşayış Kompleksinin ərazisində "Jasmin Park Yaşayış Massivi" inşa edən “Şərur MTK” iş sahəsində yeni ilkə imza atıb. Belə ki, sözügedən tikinti təşkilatı Azərbaycan Respublikası Əmək Məcəlləsinin 56 və 156-cı maddələrinə zidd olaraq, Əmək Müqaviləsində həftə ərzində 6 iş günü, iş saatları səhər 09-dan axşam saat 18-dək, nahar fasiləsi isə saat 13-dən 15-dək qeyd edilib. Ancaq buna baxmayaraq “Şərur MTK”-nın rəhbərliyi və iş icraçıları müqavilə şərtlərinə əməl etmir, əksəriyyəti məcburi köçkünlərdən ibarət olan fəhlə və digər işçi qüvvələrini bəzən səhər saat 7:30-dan axşam saat 19:40-dək, bəzən isə, hətta 22-24 saat işlədərək, açıq şəkildə kölə kimi istismar edirlər. Üstəlik fəhlələrin gördükləri iş müqabilində işçilərin alacaqları məvacibləri yerinə yetirdikləri iş həcmində vermir və cüzi məbləğ ödəməklə qalan hissəsini mənimsəyirlər. Yeri gəlmişkən onu da qeyd etmək lazımdır ki, tikinti ərazisində hambal kimi istismar edilən işçilərə nə yemək, nə də çay verilmir. Onların alın tərilə halal qazanclarından çırpışdırdıqları maddi vəsaitlər hesabına özlərinə səltənət qurublar.

Yuxarlıda sözügedən faktların təsdiqi üçün “Şərur MTK”-da iki ay fəhlə işləmiş Qobu Park-3 YK-nin sakini, Zəngilan rayon məcburi köçkünü Məmmədov Azər Sədrəddin oğlunun ərizəsini misal göstərmək olar. Məsələnin ictimailəşdirilməsini istəyən şikayətçi ərizəsində daha sonra yazır ki, “Şərur MTK”-nın sahə rəisi Ramil Abdullayev və Loğman adlı iş icraçısı konteynerdə oturub çay içə-içə söhbət etməkdən, öz adamlarını digər fəhlələrdən üstün tutmaqdan, qalan işçilərin haqqını kəsməkdən başqa bir işə yaramırlar. Belə ki, onlar bir dəfə beton tökmə işlərində Azəri gecə-gündüz 22 saat işlədib əmək haqqını düz ödəməyiblər. Sonuncu dəfə isə 29.06.2024-cü il səhər saat 07:45-də işə başlayan Azər Məmmədov 30.06.2024-cü il səhər saat 08:30-da işdən evə buraxılmış və bu 24 saatdan artıq müddətdə görülən işin müqabilində ona 50 (əlli) AZN pul yazılmışdır. Əslində isə saat hesabı ilə həmin iş günü üçün ona minimum 75 (yetmiş beş) AZN pul verilməliydi. Çünki İnşaat Sektorunun İş Qanunlarına görə beton tökmə işlərində çalışan fəhlələrin gecə xidmətinin bir iş günü üçün zəhmət haqqı ikiqat verilməli və hətta gecə növbəsində işdən sonra verilən istirahət günü də iş günü sayılmalıdır. Çox təəssüf ki, belə deyil. Üstəlik “Şərur MTK”-da təhlükəsizlik qaydalarına da əməl edilmir...

PS. Qarşı tərəfin mövqeyini də ictimailəşdirməyə hazırıq.
MİNA tv.az - ın Araşdırma Bürosu.