Qobupark Yaşayış Kompleksinə daxil olan üç yaşayış massivində 30 min nəfərə yaxın məcburi köçkün məskunlaşıb. Onların normal yaşamını təşkil etmək məqsədilə dövlət tərəfindən xeyli müsbət tədbirlər görülüb. Ancaq bununla bərabər problemlər də yox deyil. Belə ki, sakinlərə içməli su adıyla verilən texniki suyun çirkli olması, işsizliyin kütləvi hal alması, narkomaniyanın getdikcə gəncləşməsi, mövcud parklarda yaşıllığın qorunmaması, marşrut avtobuslarının çatışmaması və s. sakinlərin narazılığına səbəb olur.
194 saylı marşrut avtobusunda isə vəziyyət acınacaqlı hala çatıb. Belə ki, sözügedən marşrutda fəaliyyət göstərən avtobuslar həm tələbatı ödəmir, həm də çox çirkli olur. Havanın temperaturunun 40 dərəcəyə çatdığı bu qaynar yay günlərində həmin avtobuslarda kondisionerlərin olmaması və sürücülərin özbaşınalığı isə lap dözülməzdir. Bu barədə sərnişinlərdən birinin MİNA tv.az saytına ünvanladığı video görüntüləri təqdim edirik. Və inanırıq ki, əlaqədar organlar məcburi köçkünlərin narazılıqlarının aradan qaldırılması istiqamətində lazımi tədbirlər görəcəklər.
MinaTv.az