Rəhbəri ana dilində danışa bilməyən müəssisələrdə Azərbaycan dilinə həsr edilmiş müzakirələr keçirilməlidir.

MİNA tv.az xəbər verir ki, bunu xalq şairi Sabir Rüstəmxanlı parlamentdə “Azərbaycan dilinin dövlət dili kimi inkişaf strategiyası: Mövcud vəziyyət və perspektivlər” mövzusuna həsr edilən konfransda çıxışı zamanı deyib.

O bildirib ki, qanunların dili sadə adamların başa düşəcəyi dildə yazılmalıdır: “Təhsil haqqında qanunda məsələni mən də qaldırmışdım. Distant, interval, kampus və sair bu kimi ifadələr yer alıb. Axı "kampus" ifadəsini işlətməliyik. Niyə buna "tələbə yurdu" deməyək ki? İndi süni intellekt dilimizə düşüb, amma bu, "süni zəkadır". Bu gün Bakıda reklamlar Azərbaycan dilini silib-süpürüb aparır. “Azərbaycan", “Abşeron” yanacaq doldurma məntəqəsi kimi ifadələr var idi. Nəticədə müqəddəs ifadələr sıradan çıxarılıb. Müstəqil ölkənin dilinə belə münasibət bəsləmək olmaz. Hətta maaşımızı alanda orada yazılır ki, sizin xahişiniz emal olunur. Bu nə deməkdir? Ona görə də bu gün terminologiya məsələsinə xüsusi yanaşmaq lazımdır”.

Sabir Rüstəmxanlı hesab edir ki, terminologiya məsələsində türk dilləri ilə koordinasiya edilməlidir: “Bu gün dəb düşüb, hamı "süni intellekt" deyir, axı bu "süni zəka"dır. Süni ağıl deməkdir. Belə olmalıdır .

Digər türk dillərində lüğətə sözlük deyilir. Amma bizdə lüğət olaraq qalır. Axı, niyə hələ də köhnə fars, ərəb dilindən yapışıb dururuq, niyə dəyişmirik?!”, - o qeyd edib.