Sahib Məmmədovun Araz Paşayevə belə həssas məsələdə razılıq verməsi, onu hədəfə gətirmək üçün prosesi sürətləndirməsi qənaəti doğurur.

1 ildən artıqdır ki təhsil sahəsində çalışan işçilərin əmək, sosial-iqtisadi hüquqlarını qoruyan Həmkarlar İttifaqı Respublika Komitəsinin sədri vəzifəsinə Araz Paşayev adlı gənc bir oğlan gətirilib. Gəldiyi gündən sosial şəbəkələrdə, internet resurlarında özünün geniş PR kampaniyasını aparan bu gənc oğlan, qısa zamanda Azərbaycan Həmkarlar İttifaqları Konfederasiyasının sədri Sahib Məmmədovun qəzəbinə tuş gəldi. Bu istiqamətdə Yenixeber.org-a ötürülən məlumata görə, Sahib Məmmədovla Araz Paşayev arasındakı gərginlik artıq pik həddə çatıb. Bu gərginlikdən kimin qalib ayrılacağını isə zaman göstərəcək.

Bu günlərdə əldə etdiyimiz digər bir məlumat isə bizi həqiqətən şoka saldı. Uzun illərdir özünü təhsil eksperti, təhsil bilicisi kimi cəmiyyətə təqdim etməyə çalışan Kamran Əsədovun Elm və Təhsil İşçiləri Həmkarlar İttifaqının Nərimanov rayon Komitəsinə sədr seçilməsi xəbəri ölkənin təhsil gündəminə bomba kimi düşən xəbər oldu. Elm və Təhsil İşçiləri Həmkarlar İttifaqı Respublika Komitəsinin rəsmi facebook səhifəsində bütün digər rayonlara seçilmiş sədrlər haqqında məlumat paylaşılsa da, cəmiyyətdə birmənalı qarşılanmayacağına əmin olan Araz Paşayev bu xəbəri gizlətməyə çalışır. Hətta Kamran Əsədov da hər addımını, hər hisslərini belə sosial şəbəkələrdə ciddi ictimailəşdirməsinə baxmayaraq, günlərdir ki, bu xəbəri gizli saxlayır.

Sual yaranır, niyə hər iki tərəf ehtiyat edir?!

Mənbəmizin Yenixeber.org-a bildirdiyinə görə Araz Paşayev nə dərəcədə böyük səhv etdiyini dərk edir. Kamran Əsədov isə uzun illər sonra bu qədər tənqid, az qala təhqirlərdən sonra əldə etdiyi bu xırda “qazancı” hələ də yetərli saymır və ya özünün də Nərimanov kimi bir rayonda təhsil işçilərinə rəhbərlik etməməyə layiq olmadığını anlayır. Kamran Əsədov haqqında internet resurslarında axtarış etmək kifayət edir!

Bu məqamda yenidən xatırlatmaq istəyirik ki, Araz Paşayev Sahib Məmmədovun xəbəri olmadan nəinki kadr dəyişikliyi, heç müstəqil maliyyə əməliyyatı da edə bilmir. Bu məqamda Sahib Məmmədovun Araz Paşayevə belə həssas məsələdə razılıq verməsi, onu hədəfə gətirmək üçün prosesi sürətləndirməsi qənaəti doğurur.

QEYD: Araz Paşayev Elm və Təhsil İşçiləri Həmkarlar İttifaqı Respublika Komitəsinə sədr gətirilməzdən əvvəl Təhsil Tələbə Kredit Fondunun rəhbəri olmuşdur. Hər kəsə aydındır ki, bu vəzifəyə məhz Elm və Təhsil Naziri Emin Əmrullayevin xeyir duası ilə gəlmişdir. Emin Əmrullayevin son aylarda kəskin tənqidlərə tuş gəlməsi, təhsil ictimaiyyəti tərəfindən tənqid olunması hakimiyyət tərəfindən diqqətlə izlənilməkdədir. Məhz bu məqamda Kamran Əsədov kimi birisini neytrallaşdırmaq Emin Əmrullayevin düşüncəsində bir qələbə sayılır. Lakin proseslərin gedişatı göstərəcəkdir ki, Kamran Əsədov hansı fiqura çevrilə bilər.

P.S. Biz Yenixeber.org olaraq yazını dərc etməzdən əvvəl səslənən iddialarla bağlı qarşı tərəfi də dinləmək istədik. Təəssüf ki, bu istiqamətdəki cəhdlərimiz nəticəsiz oldu(?) (Yenixeber.org)