2024-cü ildən “Dövlət satınalmaları haqqında” yeni Qanun qüvvədədir. Keçən müddət ərzində Qanunun tətbiqi ilə bağlı icra prosesində çıxan problemlər üzrə tərəfimizdən 20-dən yuxarı istiqamətdə təklif təqdim edilib.

minatv.az xəbər verir ki, bunu Hesablama Palatasının sədri Vüqar Gülməmmədov parlamentin bu gün keçirilən iclasında bildirib.

Onun sözlərinə görə, 2025-ci ilin ilk 9 ayı ərzində 7,4 mlrd. manat məbləğində 13 mindən çox satınalma həyata keçirilib ki, bu da ötən ilin müvafiq göstəricisi ilə müqayisədə 1,2 mlrd. manat və ya 930 satınalma çoxdur:

"2025-ci ilin ilk 9 ayında keçirilmiş satınalmaların həm sayı, həm də məbləği yeni Qanun qüvvəyə minənədək keçirilən satınalmaların təxminən illik göstəricisinə bərabərdir. 9 ayda 6500 yaxın müsabiqəli satınalma keçirilib. Hesab edirik ki, yeni Qanun və cari nəzarəti həyata keçirən orqanın statusu ilə bağlı dəyişiklik rəqabətli satınalma mədəniyyətinin formalaşmasına səbəb olmuş, büdcə vəsaitinə əlçatanlıqla bağlı imkanlar genişlənib.

2025-ci ilin ilk 9 ayında müsabiqə əsaslı dövlət satınalmalarını həyata keçirmiş 1000-dən çox təşkilatdan təxminən 60%-i satınalmalara 2-ci rübdən, təxminən 30%-i isə 3-cü rübdən etibarən başlamışdır. Qeyd edim ki, əvvəlki illə müqayisədə satınalmalara gec başlamış təşkilatların sayında azalma (təxminən 20%) müşahidə edilir. Bunu müsbət məqam kimi qiymətləndirsək də, hesab edirik ki, bu göstəricinin daha da yaxşılaşma imkanları mövcuddur.

Büdcənin icra faizinin optimallaşdırılması üçün büdcə prosesinin satınalma prosesi ilə əlaqələndirilməsinin artırılmasına ehtiyac var. Eyni zamanda, hesab edirik ki, satınalmaların vaxtında təşkil edilməsi üçün ilkin satınalma planının təsdiqindən sonra satınalma proseslərinin tam həyata keçirilməsi bağlı qanunvericilikdə dəyişikliklər edilə bilər".