Azad edilmiş ərazilərdə fəaliyyət göstərən məktəblərin sayı 52-yə çatdırılacaq.

Bizimesr.media xəbər verir ki, bunu Məktəbəqədər və Ümumi Təhsil üzrə Dövlət Agentliyinin (MÜTDA) direktoru Eşqi Bağırov təhsil işçilərinin sentyabr konfransında deyib.

Onun sözlərinə görə, ötən tədris ilində Qarabağ və Şərqi Zəngəzurda fəaliyyət göstərən təhsil müəssisələrinin sayı 37-yə çatdırılıb: "Yeni tədris ilindən azad edilmiş ərazilərdə fəaliyyət göstərən təhsil müəssisələrinin sayının 52-yə çatdırılması nəzərdə tutulur. Eyni zamanda ölkənin digər bölgələrində də yeni təhsil müəssisələri şagirdlərin istifadəsinə veriləcək. Belə ki, yeni tədris ilindən 43 yeni ümumi təhsil müəssisəsinin fəaliyyətə başlaması nəzərdə tutulur".

Direktor bildirib ki, son aylarda 1000 təhsil müəssisəsində təmir işləri aparılıb, bu da təxminən 550 min şagirdin təhsil mühitinin yaxşılaşdırılması deməkdir: "Strategiyada qarşıya qoyulan hədəflərdən biri bu göstəricinin 1:6 nisbətinə çatdırılmasıdır. Son illər hər il 40 mindən çox kompüter olmaqla şagirdlərin istifadəsinə verilib. Bu ilin sonunadək əlavə 40 mindən çox kompüterin şagirdlərin istifadəsinə verilməsi ilə şagird-kompüter nisbətinin 1:6 səviyyəsinə çatdırılması nəzərdə tutulur".

Eşqi Bağırov həmçinin yeni tədris ili üçün qarşıya qoyulan hədəfləri də açıqlayıb: "Əsas istiqamətlər ötən tədris ilində müəyyənləşdirilən hədəflərlə, demək olar, eynidir. Bu da Azərbaycan dili, riyaziyyat və beşinci sinifdə rəqəmsal savadlılıq üzrə aşağı, zəif nəticə göstərən şagirdlərin payının azaldılması, yüksək nəticə göstərən şagirdlərin payında isə artıma nail olmaqdır".