Ölkənin aparıcı nəşriyyatlarından biri olan Şərq-Qərb nəşriyyatının tabe olduğu “Şərq-Qərb” ASC (VÖEN – 2000043631) maliyyə hesabatını təqdim edib.

Yeniavaz.com xəbər verir ki, “Şərq-Qərb” ASC-nin 2022-ci ildə ümumi mənfəəti 8 milyon 348 min 707 manat olub. Əvvəlki illə müqayisədə ASC-nin ümumi mənfəəti 2,5 dəfə artıb. İlin yekununda ASC-nin xalis mənfəəti 1 milyon 392 min 647 manat 34 qəpik olub və əvvəlki illə müqayisədə 240 min manat artıb.

Məlumat üçün bildirək ki, “Şərq-Qərb” ASC 14.09.2001-ci ildə dövlət qeydiyyatına alınıb. Nizamnamə kapitalı 589 min 880 manat olan ASC Əhmədli qəsəbəsi, Aşıq Ələsgər küçəsi, ev 17 ünvanında yerləşir.

ASC ilə eyni ünvanda “Şərq-Qərb Mülk” MMC, “Şərq-Qərb Nəşriyyat Evi” MMC və “Qlobal East West” MMC də yerləşir.

Qeyd edək ki, bu ünvanda vaxtı ilə 4 nömrəli Bakı Kitab Mətbəəsi fəaliyyət göstərib. 2001-ci ildə özəlləşdirilərək “Şərq-Qərb” ASC-yə çevrilib.

Qiymətli Kağız Mülkiyyətçilərinin Reyestr məlumatlarında göstərilir ki, “Şərq-Qərb” ASC-nin səhmlərinin 96,5%-i Mehdiyev Teymur Ramiz oğluna məxsusdur.

Reyestr məlumatlarında Mehdiyev Teymur Ramiz oğlunun qeydiyyat ünvanı Bakı şəhəri İstiqlaliyyat küç., ev 9, m. 31 göstərilir ki, həmin ünvanda həm də Prezident Aparatının sabiq rəhbəri, AMEA-nın keçmiş Prezidenti Ramiz Mehdiyev qeydiyyatdadır.

Qeyd edək ki, Ramiz Mehdiyevin yeganə oğlu general-mayor Teymur Mehdiyev hal-hazırda Fövqəladə hallar nazirinin müavinidir.

Onu da bildirək ki, bir neçə il əvvəl Hesablama Palatası Baş Prokurorluğa müraciət edib ki, 2019-cu ildə AMEA ilə “Şərq-Qərb” ASC arasında imzalanan 10,4 milyon manatlıq müqavilədə cinayət tərkibi olduğu üçün istintaq başlatsınlar. Hesablama Palatasının haqqında bəhs etdiyi müqavilə imzalanan zaman Ramiz Mehdiyev AMEA-nın prezidenti olub.

Bunlardan başqa ASC ilə eyni ünvanda yerləşən “Şərq-Qərb Mülk” MMC-nin hazırkı direktoru Ələkbərov Oqtay Zeynal oğlu Ramiz Mehdiyevin əvvəllər rəhbərlik etdiyi AMEA-da Fizika İnistitutunun Yarımkeçirici strukturların fotoelektrik və optik diaqnostikası laboratoriyasının rəhbəridir. Ramiz Mehdiyevin müəllifi olduğu əksər kitablar da “Şərq-Qərb” nəşriyyatında çap olunub.(Yeniavaz.com )