Paytaxt Bakıda sıxlıq səbəbindən avtomobil idarə etmək çox çətinləşib. Avtomobili saxlamaq üçün yer tapmaq isə müşkül məsələyə çevrilib. Hünərin var, avtomobili yol kənarında saxlayıb bir az maşından uzaqlaş! Dərhal DYP-nin mülki formalı əməkdaşları, sənin avtomobilinin şəklini gizli çəkib mərkəzə ötürürlər. Bir azdan isə, avtomobil sahibinin telefonuna mesaj gəlir ki, “sizin avtomobiliniz filan qədər cərimə edilib. Onlayn ödəyin!” Ödəniş edəndən sonra isə, üzüyolalığını görüb, növbəti günlərdə yeni cərimələr tətbiq edirlər.
Deyilənləri faktlar əsasında araşdıraq. Müstəqil İctimai Nəzarət Agentliyinə (MİNA tv.az) məxsus AZE 90 SJ 655 dövlət hömrə nişanlı, “Subaru İmreza” markalı avtomobilə son 50 gündə üç dəfəyə ümumilikdə 100 AZN cərimə yazılıb. Onlardan ikisi Lökbatan qəsəbəsinin girişində yerləşən “Xəyal” restoranının qarşısındakı avtobus duracağı ətrafında dayanma-durma qaydalarının pozulmasına görə 40 gün ərzində tətbiq edilib. Olsun! Amma...
Amması da odur ki, taksi fəaliyyəti göstərən avtomobillər sözügedən avtobus duracağının Qobu Park Yaşayış Kompleksi istiqamətində elə dayanırlar ki, şəhərdən gələn şəxsi avtomobillər zəruri hallarda da orada dayanmağa yer tapa bilmirlər. Hətta onlardan keçib bir neçə saniyəliyə avtomobili saxlasan, nişan göstərici xətləri pozulmuş avtobus duracağına, guya 15 metrdən daha yaxın məsafədə saxlandığına görə dərhal cərimə tətbiq edilir. Bu halda ortaya yeni suallar çıxır. Nə üçün sözügedən ünvanda küçə hərəkətini məhdudlaşdıran taksi maşınları avtobus duracağından yığışdırılmır? Üstəlik həmin taksi sürücülərinə belə cərimələr tətbiq edilirsə, taksi sürücüləri təkrarən orada necə maşın saxlayırlar? Məgər zülümlə qazandıqları pul vəsaitlərini DYP-nə cərimə ödəməkdən bezmirlərmi? Bununla əlaqədar Qaradağ rayon DYP şöbəsinə müraciət etdik. Adını bildirməyən polkovnik-leytenant rütbəli zabit dedi ki, “cəriməni biz yazmırıq, orada qanun pozuntularını qeydə alan radar yazır.” Elədirsə, qanunsuz dayanmış taksi avtomobillərini radar necə qeydə almır? - sualımıza zabit cavab verdi ki, guya “taksi avtomobilləri dolayı saxlandığına görə nömrələrini qeydə almaq mümkün olmur.” Elə isə, “nə üçün sözügedən taksi maşınları qanunsuz zəbt etdikləri ərazidən yığışdırılmır?” - sualına isə, “o, bizim işimiz deyil!”- cavabını verdi. Qəribədir. Bəs kimin işidir? Birbaşa səlahiyyətinə aid olan məsələni inkar etmək səhlənkarlıq deyilmi? Belə çıxır ki, yuxarıda qeyd etdiyimiz kimi taksi sürücülərinin sözügedən ərazini qanunsuz zəbt etməsi DYP tərəfindən şəxsi avtomobil sürücüləri üçün qurulmuş tələdir. Bu isə, suyu bulandırıb balıq tutma sevdasından başqa bir şey deyil.
Heç on gün keçməmiş, “Subaru İmpreza” markalı AZE 90 SJ 655 dövlət nömrə nişanlı avtomobil sürücüsünün cərimə ödənişlərini dərhal yerinə yetirdiyini görən DYP əməkdaşları bu dəfə yeni üsulla cərimə tətbiq ediblər. Belə ki, 19.07 2024-cü il tarixdə “Azərbaycan Nəşriyyatı”nın qarşısından keçən avtomobil yolunun bir xəttində təmir işləri aparılarkən, avtomobillərin hərəkəti üçün açıq olan digər xəttinin kənarında xeyli maşın dayanması səbəbindən, sözügedən avtomobilin sürücüsü maşını saxlamaq üçün yer olmadığını görüb qəza işıqlarını yandırır və avtomobildən düşüb ara yollarda yer axtarmaq məqsədilə maşından bir neçə metr uzaqlaşır. Bir-iki dəqiqədən sonra geri qayıdanda maşınının ön və arxa hissəsində mülki formalı iki nəfərin gəzişdiyini görür. Onlardan biri yol kənarında saxladığı avtomili sıradan geri çıxarır, digəri isə gülə-gülə “Subaru...” avtomobilinin yer axtaran sürücüsünə işarə edir ki, maşınını burada saxlaya bilərsən. Sonra həmin şübhəli şəxslər gülə-gülə öz avtomobillərinə oturub oradan uzaqlaşırlar. “Azərbaycan nəşriyyatı”nda iş yerinə gələn “Subaru...”nun sürücüsü ofisə daxil olandan bir neçə dəqiqə sonra şəxsi telefonuna mesaj gəlir ki, “Mətbuat prospekti-529 məhəlləsində dayanma-durma qaydalarını pozduğunuza görə 20 AZN cərimə edilirsiniz. Onlayn ödəyin!” Bu olaydan xəbər tutan digər redaksiya əməkdaşları, məsələnin nə yerdə olduğunu ona izah edirlər. Yalnız bundan sonra “Subaru...”nun sürücüsü anlayır ki, onun avtomobilinin ətrafında gəzişən o iki şübhəli mülki formalı şəxslər yol polisləri imiş. Belə yerdə şair deyir ki:

PS-1. Son olaraq bildiririk ki, “Azərbaycan Nəşriyyatı”nın qarşısındakı küçədə təmir işləri aparılarkən, yolun açıq və digər avtomobillərin hərəkətinə mane olmayan hissəsində maşınını saxlamaq üçün yer axtaran və qanuna müvafiq şəkildə zəruri qəza işıqlarını yandıran sürücüyə, yolun kamera olmayan hissəsində mülki formalı yol polislərinin onun maşınının gizli şəkillərini çəkib mərkəzə ötürməklə cərimə tətbiq etmək şərəfli polis adına yaraşmaz. Yəqin ki, Respublika DYP-nin rəhbəri cənab general Ramiz Zeynalov vacib olan tədbirlər görəcək.
PS-2. Bu materialı hazırlayıb sayta yükləyərkən məlum oldu ki, DYP-nin telefona göndərdiyi mesajda digər məlumatlar olsa da, hadisə yerində çəkilmiş fakt təsdiqləyici şəkillər silinib. Həmin şəkilləri çəkənlərin simaları da şəkillərdə əks olunmuşdu. Yəqin ki, şəkillərin belə tez silinməsi, sözügedən avtomobilin şəkillərini çəkən mülki formalı polislərin öz simalarını gizlətmək məqsədi daşıyır.
(Mövzuya qayıdacayıq)
MİNA tv.az saytının Araşdırma bürosu