Oktyabrda İçərişəhərdə qastronomiya festivalı keçiriləcək
İçərişəhərdə qastronomiya festivalı keçiriləcək.
Bu barədə "İçərişəhər" Dövlət Tarix-Memarlıq Qoruğu İdarəsindən məlumat verilib.
Qeyd olunub ki, "GastroFest 2026" festivalı 3-4 və 10-11 oktyabr tarixlərində keçiriləcək.
Festival qastronomiya, musiqi, yaradıcılıq və müxtəlif mədəni təcrübələri vahid festival konsepsiyasında birləşdirən, müxtəlif yaş qruplarından olan iştirakçılar üçün zəngin və çoxşaxəli proqram təqdim edən dördgünlük festivaldır.
Festival çərçivəsində ziyarətçilərə yeni dadların kəşfi, yaradıcı fəaliyyətlər, maraqlı görüşlər və canlı musiqi proqramları vasitəsilə rəngarəng və dinamik festival atmosferini yaşamaq imkanı yaradılacaq.
Proqramda tanınmış şeflərlə görüşlər, müxtəlif mətbəx nümunələri, küçə yeməkləri və yeni dadların təqdimatı da nəzərdə tutulub.
Həmçinin burada uşaqlar üçün xüsusi ustad dərsləri, interaktiv fəaliyyətlər və əyləncəli proqramlar da gözlənilir.
