Küveyt XİN İranın ölkə ərazisinə hücumlarını qətiyyətlə pisləyib
Küveytin Xarici İşlər Nazirliyi (XİN) İranın ölkə ərazisinə hücumlarını qətiyyətlə pisləyib.
Bu barədə nazirliyin bəyanatında bildirilir.
Bəyanatda vurğulanır ki, Küveyt İranın ölkəyə qarşı "təcavüz aktlarını" "suverenliyinin kobud şəkildə pozulması" kimi qiymətləndirir.
"Bu hücumlar davam edən regional və qlobal gərginliyin azaldılması səylərini sarsıdır və bu yolu dəstəkləyən beynəlxalq iradəyə birbaşa meydan oxuyur", - sənəddə deyilir.
Qeyd olunur ki, Küveyt suverenliyini mühafizə etmək, təhlükəsizliyi və sabitliyi, xalqın və ərazisinin sakinlərini qorumaq üçün bütün zəruri tədbirləri görmək hüququnu özündə saxlayır.
Daha əvvəl İslam İnqilabı Keşikçiləri Korpusu (SEPAH) bildirib ki, bazar günü gecə Küveytdəki Əli-əl-Salem hava bazasında və Bəhreynin Salman şəhərində ABŞ-nin beşinci donanmasının bazasında Birləşmiş Ştatların səkkiz mühüm hərbi obyektinə zərbə endirib.
