Ötən gün məlumat vermişdik ki, Aysel Vaqif qızı Soltanova Azərbaycan Nəqliyyat və Kommunikasiya Holdinqinin (AZCON) icraçı direktoruna müşavir təyin edilib.
XALQ bu təyinatla bağlı kiçik bir araşdırma aparıb.
Nəticədə məlum olub ki, yeni təyinat heç də səbəbsiz olmayıb. Belə ki, Aysel Soltanova Nəqliyyat, Rabitə və Yüksək Texnologiyalar Nazirliyində çalışan həyat yoldaşının sayəsində belə yüksək vəziyyətə təyinat alıb. Söhbət sözügedən nazirliyinin müşaviri Rəşad Bayramovdan gedir.
Xatırladaq ki, A.Soltanova 1986-cı ildə anadan olub. Azərbaycan Dillər Universitetində Amerikaşünaslıq üzrə bakalavr, Mərkəzi Avropa Universitetində İctimai siyasət üzrə magistratura təhsili alıb. Hazırda təhsilini İngiltərənin York Universitetində Biznes administrasiyası (MBA) ixtisası üzrə davam etdirir.
O, əmək fəaliyyətinə "BP" şirkətində başlayıb, daha sonra Beynəlxalq Əmək Təşkilatında fəaliyyət göstərib. 2011-2023-cü illərdə "Procter & Gamble", "Azərkosmos" və "Aztelekom" kimi şirkətlərdə müxtəlif rəhbər vəzifələrdə çalışıb. 2023-cü ilin yanvarından son təyinata qədər "Azərbaycan Dəmir Yolları" QSC sədrinin müşaviri olub.
Tribunainfo.az-ın araşdırması nəticəsində yeni müşavirin elə müşavir həyat yoldaşı haqqında da martaqlı detallar üzə çıxıb. Məlum olub ki, Rəşad Bayramov 2021-ci ilin martında müşavir postuna təyinat alıb. Onun şəxsi xarakteristikasında qeyd edilir ki, Bayramov beynəlxalq səviyyəli biznes təlimçisidir. Təlimçi olmaqla yanaşı, Rəşad Bayramov həmçinin Azerbaycanda BP şirkətində modernləşdirmə və tranformasiya üzrə rəhbər vəzifəsində çalışıb. Yəni, həyat yoldaşı ilə BP-də də birlikdə çalışıblar.
Ictimai çıxışlar və korporativ kommunikasiya üzrə məqalələrin müəllifi Rəşad Bayramovun "Sözünə güvən: Auditoriyanı fəth etməyin on yolu" adlı kitabı 2016-cı ilin sonunda işıq üzü görüb. Rəşad Bayramov ABŞ-in Roçester Texnologiya İnstitutunda kommunikasiya və marketinq üzrə magistr (2004-cü il), Azərbaycan Dillər Universitetində isə filologiya üzrə magistr (2001-ci il) dərəcələrini əldə edib.Tribunainfo.az