Hava limanında vətəndaşın qolundan zorla açılaraq anbara qoyulan 25 min dollarlıq saatı oğurlanıb; 4 aydır nə saat tapılır, nə də zərər ödənilir

Gəncə şəhəri, Nəriman Nərimanov küçəsi, ev 409-da yaşayan Əliyev Şahin Bəhrəm oğlu tərəfindən “Hürriyyət” qəzetinin redaksiyasına şikayət məktubu daxil olub. Rəsmi qurumlar tərəfindən kifayət qədər maddi və mənəvi zərərə məruz qoyulduğunu bildirən şikayətçinin qəzetimiz vasitəsilə Prezident İlham Əliyevə ünvanladığı məktubu olduğu kimi dərc edirik:

“Cənab Prezident!

Biz Ulu öndər tərəfindən qurulmuş və Sizin uğurla idarə etdiyiniz hüquqi demokratik dövlətdə yaşayırıq. Lakin bəzi məmurlar qanunları, Ali baş komandanın göstəriş və tövsiyyələrinə zidd əməllər edərək, mənə, yəni dövlətini, xalqını və millətini sevən - Azərbaycan Respublikası müharibə və polis veteranına qarşı küllü miqdar maddi və mənəvi ziyan vurublar.

Bildirirəm ki, 26.09.2023-cü il tarixində Dubay-Bakı reysi ilə gələrkən Heydər Əliyev adına Bakı Hava Limanında gömrük işçilərinin vəzifədən sui-istifadə etmələri və özbaşınalıqları nəticəsində qolumdan zorla (cinayətkarcasına) 25 000 ABŞ dolları dəyərində qol saatım alınaraq, anbara qoyulub.

Dəfələrlə müraciət etdikdən sonra mənə bildirildi ki, saat anbardan oğurlanıb və bu barədə Gömrük İdarəsində təhqiqat araşdırması aparılır. 4 ay (qanunla 10 gün olmalıdır) təhqiqat araşdırması aparıldıqdan sonra, cinayət işi başlanılması üçün material Azərbaycan Respublikası Baş Prokurorluğuna göndərildi.

Bu günə qədər həmin material Baş Prokurorluq tərəfindən araşdırılır və bu barədə AR DİN-in HNBPİ-də 16.03.2024, 23.07.2024, 21.12.2024-cü il tarixli, Xəzər Rayon Prokurorluğunda 28.03.2024 və 14.05.2024-cü il tarixli, Baş Prokurorluqda isə 24.10.2024 və 06.02.2025-ci il tarixli, yəni 7 dəfə qərar qəbul olunub. Lakin hələ də araşdırma aparılır və baş vermiş cinayət hadisəsi ört-basdır edilir. Görünür, bu işdə böyük qüvvələr maraqlıdır.

Bu günə qədər nə mənim saatım qaytarılıb, nə də mənə dəymiş maddi ziyan ödənilib. Bu barədə iki dəfə AR DGK-nın sədri Şahin Bağırov və Baş prokuror Kamran Əliyevin qəbulunda olsam da, heç bir nəticə əldə olunmayıb. Əksinə, mənə qarşı özbaşınalıq, hədələr və təxribatlar davam edir.

Mənə qarşı baş vermiş aşağıdakı qanun pozuntuları cavabsız qalır:

1. Gömrük işçiləri tərəfindən qolumdan saatım zorla alınıb, yəni xidməti vəzifədən sui-istifadə (soyğunçuluq) edilib. Bu barədə Ulu öndər Heydər Əliyevin məşhur çıxışı var.

2. Qanunla məndən alınmış saat ölkədən geri qaytarılması üçün hava limanında saxlanca qoyulmalı olduğu halda, nə üçün kargo anbarına göndərilib?!

3. Mən saatı ölkədən geri qaytarmaq üçün ərizə ilə müraciət etsəm də, Gömrük işçilərinin süründürməçilik və özbaşınalığı nəticəsində 1 aydan çox uzadılıb və oğurlanıb.

4. Nə üçün faktla bağlı Gömrük İdarəsində təhqiqat araşdırması 4 aya yekunlaşıb(qanunla 10 gün müddətində yekunlaşmalıdır)?!

5. Mənim qolumdan saatımın alınmasına, anbardan oğurlanmasına aid bütün kamera görüntüləri silinib.

6. Bu günə qədər nə mənim saatım qaytarılıb, nə maddi ziyan ödənilib, nə də fakta görə cinayət işi başlanıb, yəni bütün qanun pozuntuları ört-basdır olunub.

Cənab Prezident!

Mən Sizinlə fəxr edirəm və inanıram ki, ədalət öz yerini tapacaq”.

Hazırladı: Jalə FAMİLQIZI

Redaksiyadan: Mövzunu davam etdirəcəyik. Qarşı tərəfin mövqeyini də dərc etməyə hazırıq.