MƏĞRURNAMƏ
İblis fitnə-fəsad ilə Tanrıdan lənət qazanıb,
İnsanları aldadaraq onlardan nifrət qazanıb.
Qovulanda yer üzünə, Yaradana yalvararaq,
Ta qiyamət anınadək qəlblərdə fürsət qazanıb.
Bil ki, dosta xain çıxan, ömür boyu peşman olar,
Bu gün sənə sadiq olan, sabah dönüb düşman olar.
Namərdlərə bəyan edər, yayar sənin hər sirrini,
Xalq içində qınanarsan, sənə də bu iş man olar.
Çalış uyma nə qadının, nə şərabın fət-felinə,
Ürəkləri şad etməsən, heç vermə qəm də elinə!
Yalnız aqil kəlmələrlə qazanarsan daim hörmət,
Məclislərdə yersiz sözlər gətirməsən ta dilinə.
Məqsədinə çatmaq üçün, daim çalış təpərli ol,
Qürurunla, qeyrətinlə silahlanıb sipərli ol!
Hər tərəfdən hücum edən qarı düşmən qarşısında,
El-obandan dəstək al ki, millətinlə çəpərli ol!
Cəmiyyətlə yaxşı dolan, tabutunu el aparsın,
Haram sərvət toplama ki, sən öləndə yel aparsın!
Bu dünyada halal qazan, o dünyanın rəhmətini,
Qoyma məzar evini də aşıb-daşan sel aparsın!
Böyük sözü eşitməsən, haqqına çoxu girəcək,
Səni yıxmaq istəyənlər, daim tələ, tor hörəcək.
Hətta nəsib olmayacaq nə pul-para, nə də sərvət,
Yalnız Məğrur dözənməyib, dəstəyini tez verəcək.
Yaqub Məğrur
2.08.2025-ci il
