Azərbaycan Arıçılar Assosiasiyasının sədri Bədrəddin Həsrətov Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən cərimələnib.
Qaynarinfo-nun məlumatına görə, nizamnamə kapitalı 20 manat, qanuni təmsilçisi Bədrəddin Həsrətov olan”Api Delta Group” Məhdud Məsuliyyətli Cəmiyyəti (MMC) barəsində İnzibati Xətalar Məcəlləsinin 469.1-ci maddəsi ilə protokol tərtib edilib və iş məhkəməyə göndərilib.

Məhkəmədə Bədrəddin Həsrətov bildirib ki, rəhbərlik etdiyi şirkətə iki aylıq işçi götürüb. Onların bu müddətə görə siğortalanmasına ehtiyac olmadığını düşünüb. Həmçinin bildirib ki, hazırda rəhbərlik etdiyi MMC-i ilə yanaşı, Qarabağda arıçılığın inkişafı ilə əlaqədar dövlət layihəsinə rəhbərlik edir. Buna görə də ünvanlanmış məktublardan məlumatı olmayıb.
Məhkəmənin qərarı ilə MMC 5.000 manat, Bədrəddin Həsrətov isə 1500 manat məbləğində cərimə olunub.
Xatıradaq ki, İnzibati Xətalar Məcəlləsinin 469-1-ci maddəsi – “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortası haqqında” Azərbaycan Respublikasının Qanununa əsasən, hər bir işçinin istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortalanmamasına, o cümlədən müvafiq riskləri icbari qaydada sığorta etdirmək vəzifəsi müəyyən edilmiş fiziki və ya hüquqi şəxslər tərəfindən sığortaçı ilə icbari sığorta müqaviləsinin bağlanmamasına görə vəzifəli şəxslər min beş yüz manat məbləğində, hüquqi şəxslər beş min manat məbləğində cərimə edilir.

Qaynarinfo