Sizə müraciət edərək bildirirəm ki, SPACE TV-nin əməkdaşı Səidə Bəkir qızı öz şəxsi fəaliyyətində bir milyondan çox, demək olar ki, iki milyona yaxın məcburi köçkünü təhqir edən, aşağılayan ifadələr işlətmiş, sosial şəbəkə üzərindən isə məcburi köçkünlərin təhqir olunmasına şərait yaratmışdır.
Səidə Bəkir qızının son zamanlarda davamlı şəkildə apardığı bu çirkin fəaliyyət sadəcə bir şəxsin fikri yox, artıq cəmiyyətimizdə ayrı-seçkilik, nifaq, kin və nifrət toxumu səpən bir kampaniya halına çevrilmişdir. O, dövlətimizin ən həssas təbəqəsi olan məcburi köçkünləri hədəf seçərək, sosial mediada insanların arasında qarşıdurma yaratmağa çalışır. Bu isə həm cəmiyyətimizin birliyinə, həm də dövlətimizin daxili sabitliyinə açıq-aşkar təhlükədir.
Təəssüf doğuran hal odur ki, Səidə Bəkir qızının bu təxribatçı fəaliyyətinin nəticəsində artıq sosial şəbəkələrdə qarşılıqlı təhqirlər, narazılıqlar yaranmış, hətta 44 günlük Vətən Müharibəsində qəhrəmancasına şəhid olmuş igidimizin atası belə təhqir hədəfinə çevrilmişdir. Şəhid atalarının təhqir olunması isə sadəcə mənəvi yox, həm də milli dəyərlərimizə qarşı açıq-aşkar hörmətsizlikdir.
Məcburi köçkünlərin yaşadığı acı taleyi, çəkdikləri zülmləri hər bir azərbaycanlı bilir. Bu xalqın dərdinə şərik olmaq əvəzinə, onları aşağılamaq, təhqir etmək, onların üzərinə sosial mediada insanları qaldırmaq qəbuledilməzdir. Səidə Bəkir qızının davranışı düşmənçilik siyasətidir və bu siyasətin nəticəsi dövlətin maraqlarına zidd olan qarşıdurmalara gətirib çıxara bilər.
Hörmətli Vado Korovin! Siz SPACE TV-nin rəhbəri olaraq məsuliyyət daşıyırsınız. Əgər Səidə Bəkir qızının bu hərəkətlərinə qarşı dərhal tədbir görülməzsə, məcburi köçkünlərin və bütün ictimaiyyətin haqlı olaraq belə qənaətə gəlməsinə səbəb olacaq ki, SPACE TV bu təhqiramiz fəaliyyətin arxasında dayanır, onu dəstəkləyir.
Sizdən tələb edirik ki, SPACE TV əməkdaşı Səidə Bəkir qızının məcburi köçkünlərə qarşı yönəlmiş bu iyrənc kampaniyasına son qoymaq üçün ən qəti tədbirləri görəsiniz. Əks halda, bu məsələ ilə bağlı aidiyyəti dövlət orqanlarına və ictimaiyyətə müraciət olunacaq, məsələ hüquqi müstəviyə daşınacaq.
Cəmiyyətin birliyinə, dövlətimizin sabitliyinə, şəhid ailələrinin və məcburi köçkünlərin ləyaqətinə zərbə vuran bu iyrənc təbliğata son qoymaq Sizin birbaşa borcunuzdur.