Ötən ilin ilk 11 ayı ərzində Azərbaycanın ixrac etdiyi qeyri-neft məhsulları arasında fındıq 4-cü sırada qərarlaşıb.

Ötən il qızıl, pomidor və karbamiddən sonra xaricə ən çox fındıq ixrac olunub.
Açıqlanan rəsmi məlumatlara görə, ötən ilin 11 ayı ərzində 149,8 milyon dollar dəyərində fındıq ixrac olunub və bu, əvvəlki ilin eyni dövrü ilə müqayisədə 31,5% çox olub.
Dövlət Gömrük Komitəsinin ötən ilin ilk 10 ayı üçün açıqlanan məlumatında isə göstərilir ki, ötən ilin ilk 10 ayında xaricə 265,8 ton qabıqlı, 15 min 162 ton qabığı təmizlənmiş (ləpə) fındıq ixrac edilib.
İxrac olunan qabıqlı fındığın bir kiloqramının orta gömrük dəyəri 4,5 manat, fındıq ləpəsinin bir kiloqramının orta gömrük dəyəri isə 13,9 manat olub.
Müqayisə üçün bildirək ki, əvvəlki ilin eyni dövründə qabıqlı fındığın bir kiloqramının orta gömrük dəyəri 4,1 manat, fındıq ləpəsinin bir kiloqramının orta gömrük dəyəri isə 10,9 manat olub.
Miqdar baxımından isə fındıq ixracında ciddi dəyişiklik olmayıb. 2024-cü ilin ilk 10 ayında olduğu kimi, 2025-ci ilin ilk 10 ayında da xaricə 15,4 min ton fındıq və fındıq ləpəsi ixrac edilib.
Onu da bildirək ki, əvvəlki illərdən fərqli olaraq bu il daxili bazarda fındıq qiymətlərində kəskin bahalaşma müşahidə olunur. Rəsmi statistika göstərir ki, ötən ilin ilk 11 ayında qabıqlı fındığın qiyməti 12,5%, fındıq ləpəsinin qiyməti isə 44% bahalaşıb.
Rəsmi statistikadan fərqli olaraq, marketlərdə satılan fındığın qiymətində daha çox bahalaşma olduğu müşahidə edilir.
Məsələn, ölkənin aparıcı supermarket şəbəkələrindən biri olan “Bravo”nun onlayn satış platformasında qovrulmuş fındıq ləpəsinin 300 qramı 15,99 manata (1 kq – 53,3 manat), qabıqlı fındığın 200 qramı isə 8,99 manata (1 kq – 44,95 manat) təklif olunur.
Başqa bir marketin – “Neptun”un onlayn satış platformasında isə fındıq ləpəsinin bir kiloqramı 26,7 manatdan satılır.(Yeniavaz.com)