157 minə ev tikən şirkət indi də 3.5 milyona qaz xətti çəkir- ARAŞDIRMA
Məcburi Köçkünlərin Sosial İnkişaf Fondu (MKSİF) daha bir tenderinə yekun vurub.
Fond Cəbrayıl rayonunun Şükürbəyli kəndinə qaz çəkəcək.
Məlumatda deyilir ki, qazlaşdırma prosesi 1042 ailəni əhatə edəcək. Bununla bağlı keçirilmiş tenderin qalibi “TUNEL-METRO İNŞAAT ” MMC olacaq. Qaz xəttini çəkməsi üçün şirkətlə 3 milyon 539 min 704 manata anlaşma əldə olunub.
Qeyd edək ki, “TUNEL-METRO İNŞAAT ” MMC 2024-2026-cı illərdə cəmi 6 tenderin qalibi olub. Bu tenderlərin 3-ü “Qaçqınkom”un, digər 3-ü isə Məcburi Köçkünlərin Sosial İnkişaf Fondunun keçirdikləri olub.
Tribuna.az-ın apardığı araşdırma zamanı bəlli olub ki, MKSİF 2024-cü ildə iki iri tenderi sözügedən şirkətə verib. Həmin tenderlərdən biri Cəbrayıl rayonu, Şükürbəyli kəndində 1042 ailəlik yaşayış məntəqəsinin salınması prosesini əhatə edib. Anlaşmaya əsasən şirkət fond üçün 93 ədəd birmərtəbəli ev inşa etməliymiş. “TUNEL-METRO İNŞAAT” MMC bu işlərə görə Fonddan 14 milyon 562 min 668 manat pul alıb.
MKSİ-in elə həmin il Şükürbəyli kəndində daha bir “əməliyyatı” qeydə alınıb. Məlum olub ki, 63 ədəd fərdi yaşayış evinin tikintisi də sözügedən şirkətə həvalə olunub. Bunun müqabilində isə 10 milyon 12 min 580 manat ödəniş alınıb.
Bu rəqəmlərdən belə anlaşılır ki, “Tunel-Metro İnşaat” MMC Cəbrayılın Şükürbəyli kəndidən bir evi 157 min 533 manata tikib.
Araşdırma zamanı məlum olub ki, “Tunel-Metro İnşaat” MMC 2001-ci ildə təsis edilib. Dövlət Vergi Xidmətinin reyestr məlumatlarından aydın olur ki, MMC 2008-ci ilə qədər “Rəmzi-1” Kiçik Müəssisəsi adlanıb. 2008-ci ildə şirkətin adı dəyişdirilib.
Nizamnamə kapitalı 10 manat olan “Tunel-Metro İnşaat” MMC-nin qanuni təmsilçisi Seyfullayev Şövqi Xalid oğludur. Şirkətin təsisçisi isə Qərib Dadaşovdur. O, vaxtilə “Azərtunelmetrotikinti” ASC-nin Xüsusi Hidrotexniki İşlər İdarəsinin rəisi vəzifəsində işləyib. Sözegdən ASC dövlət şirkəti olub. 2014-cü ildə “Bakı Metropoliteni” QSC-nin tabeliyinə verilib.(Tribuna.az)
Qarşı tərəfi də dinləməyə hazırıq.
