Təhsil müəssisələri biliyin və mənəviyyatın ocağı sayılsa da, bəzən oradan gələn xəbərlər tamamilə fərqli bir mənzərəni ortaya qoyur. Hazırda Qaradağ rayonu, Qobu Park 3 yaşayış kompleksində yerləşən Zəngilan rayon 21 nömrəli tam orta məktəbi ətrafında ciddi qalmaqal yaşanmaqdadır. Valideynin redaksiyamıza ünvanladığı şikayət və məktəb rəhbərliyinə qarşı irəli sürülən iddialar təhsil ocağında özbaşınalığın hökm sürdüyünü göstərir.

Məktəbdəki vəziyyəti yerində müşahidə edən valideynin iddialarına görə, yuxarı siniflərdə şagird davamiyyəti bərbad vəziyyətdədir. Məsələn, kağız üzərində 20 şagirdi olan 10-cu sinifdə dərsin gedişatı zamanı cəmi 2 şagirdin iştirak etdiyi bildirilir. Bundan əlavə, 11-ci sinifdə 1 şagird, 9-cu sinif 3 şagird dərsdə iştirak etmişdir. Bu isə təkcə bir məktəbin deyil, bütöv bir təhsil prosesinin nəzarətdən çıxdığının göstəricisidir.
Ən səs-küylü iddia isə məktəbin direktoru Sona Əliyeva ilə bağlıdır. Məlumata görə, 12 fevral 2026-cı il tarixində direktor iş yerində olmayıb və bunun üçün heç bir rəsmi qurumdan icazə almayıb. Məktəb daxilində yayılan söz-söhbətlərə görə, direktor həmin gün işə gəlmək əvəzinə, narkotik vasitələrin satışı ilə bağlı cəza çəkən həyat yoldaşı Müşviq Əliyevin yanına – 13 saylı cəzaçəkmə müəssisəsinə yollanıb.
Sona xanım isə bu iddiaları təkzib edərək, həmin gün "sektorda iclasda" olduğunu bildirib. Lakin məktəbin müəllim heyəti və digər mənbələr həmin gün heç bir rəsmi iclasın keçirilmədiyini, direktorun dərslərdə iştirak etməməsinin qanunsuz olduğunu iddia edirlər.
Hadisələrin gərginliyi bununla bitmir. Övladının sənəd işləri üçün məktəbdə olan və dərsdə əyləşən valideynin varlığı direktor tərəfindən narazılıqla qarşılanıb. İddia olunur ki, Sona Əliyeva vəziyyəti gərginləşdirmək üçün mühafizə düyməsini basaraq məktəbə polis çağırıb. Hadisə yerinə gələn hüquq-mühafizə orqanları əməkdaşları isə heç bir ictimai asayişin pozulmadığını müəyyən ediblər. Hazırda bu əsassız çağırışla bağlı direktordan izahat alınacağı gözlənilir.
Artıq məsələ yerli səviyyədən çıxaraq dövlət rəhbərliyi müstəvisinə keçib. Vəziyyətin dözülməz olduğunu görən valideyn artıq Ölkə Prezidentinə və Baş Prokurorluğa teleqramlar vuraraq, Zəngilan rayon 21 nömrəli məktəbdəki qeyri-qanuni halların araşdırılmasını xahiş edib.
Təhsil ocağında baş verən bu "özbaşınalıq" və "saxta iş prinsipləri" ilə bağlı aidiyyatı qurumların verəcəyi qərar maraqla gözlənilir.(tehsil.media)