Sakinlər burada ev aldıqlarına peşman oldular….

Qaradağ rayonunun Lökbatan qəsəbəsində yerləşən “Bakı Cənub Qapısı Yaşayış Kompleksi”nin sakinləri iddia edirlər ki, artıq 8 ilə yaxındır burada yaşasalar da, mənzillərinə çıxarış ala bilmirlər. Vətəndaşların sözlərinə görə, məsələ ilə bağlı dəfələrlə aidiyyəti qurumlara müraciət etsələr də, problem hələ də həllini tapmayıb. “6 ildən çoxdur burada mənzil almışam. Bu müddət ərzində çıxarışla bağlı bir çox vədlər verilib. Lakin onların heç biri yerinə yetirilməyib”, – deyə sakinlərdən biri bildirib. Digər bir vətəndaş isə qeyd edib ki, təmirsiz halda mənzil üçün 40 400 manat ödəniş ediblər: “Evin çıxarışı olmadığı üçün uşağımı hər hansı bir yerdə qeydiyyatdan keçirə bilmirəm”. Məsələ ilə bağlı Dövlət Şəhərsalma və Arxitektura Komitəsindən vurğulanıb ki, sözügedən yerin adı “Rahat Evlər” deyil, “Şah İnşaat” MTK-dır və istismara icazə ilə əlaqədar Komitəyə rəsmi müraciət daxil olmayıb. Fövqəladə Hallar Nazirliyi isə açıqlamasında qeyd edib ki, göstərilən ünvanda inşa olunan yaşayış kompleksinə Nazirlik tərəfindən istismara hazırlıq aktı təqdim edilib. Mövcud vəziyyətlə bağlı Əmlak Məsələləri Dövlət Xidmətindən bildirilib ki, çoxmənzilli yaşayış binaları üzrə tikinti obyektinin istismara icazə sənədi təqdim edildikdən sonra həmin binalarda mənzil əldə etmiş şəxslər “Daşınmaz əmlakın dövlət reyestri haqqında” Qanunun 8.0.6-cı maddəsinə uyğun olaraq mənzil-tikinti kooperativi üzvlərinin ümumi yığıncağının qərarı və pay haqqının tam ödənilməsini təsdiq edən sənədlə müvafiq “ASAN xidmət” mərkəzinə müraciət edə bilərlər. Qurumdan vurğulanıb ki, bundan sonra mənzillər üzərində hüquqların daşınmaz əmlakın dövlət reyestrində qeydiyyata alınması məsələsinə qanunvericiliyə uyğun qaydada baxılacaq.(Xalq.online)