Xəbər verildiyi kimi, Prezident Administrasiyasının idarəçiliyində olan “Azərbaycan” nəşriyyatı əsaslı təmirə dayandırılıb, amma nəşriyyatda uzun illər icarədə olmuş redaksiya jurnalistlərinin peşə fəaliyyətinə ciddi problemlər yaradılmaqdadır. Belə ki, redaksiyalara alternativ yer təklif edilmədən nəşriyyatdan çıxarılmaları buna gətirib çıxarıb. Avropa Mətbuat Federasiyasının üzvü, “Tərəqqi” medallı, “Təzadlar” qəzetinin baş redaktoru Asif Mərzili bu barədə narahatlıq dolu status paylaşıb. “Yenixeber.org” xatırladır ki, həmin statusda deyilir: “Dostlar, belə başa düşürəm ki, təxminən 10-12 ha bahalı torpaq sahəsi olan “Azərbaycan” nəşriyyatını əsaslı təmirə dayandırmaq bəhanəsi ilə bu tarixi media məkanını ələ keçirmək istəyənlər 30-40 ildir icarəçi olmuş və 100-200 min manat icarə haqqı ödəmiş redaksiyalara alternativ yer vermədən, təmiri mərhələli etmədən bizi köçkün vəziyyətinə çatdırıblar. Təkcə təmirinə 20 min manata yaxın(studiya və s. daxil) əlavə xərc də çəkilmiş otaqlarımızdan (tezadlar.az redaksiyası) avadanlığımızı çıxarıb harasa apara bilmirik. Onlarla redaksiya bu gündədir. Mətbuat Şurasının sədri Rəşad Məcid prezidentin köməkçisi Hikmət Hacıyevin və sektor müdiri Vüqar Əliyevin adından bizləri qəbul etdi, amma problem həll edilmədi… Sonra Hikmət Hacıyevin qəbulunda olduq, sektor müdiri Elmir Vəlizadə və daha bir əməkdaş iştirak etdi, bizi dinlədi, sağ olsun, vəziyyətimizi qiymətləndirdi, kömək ediləcəyini dedi… On gündən çox vaxt ötür, yenə də qalmışıq ortalıqda… Belə başa düşürəm ki, kimlərsə jurnalistləri küçəyə çıxmağa, Prezidentin iradəsinə zidd olaraq media əməkdaşlarını etirazlara sürükləməyə çalışır.
İmzalı jurnalistlərin adından deyirəm: bizlərə sahib çıxın, sonra gec olacaq! Media azadlığına və jurnalistlərin peşə fəaliyyətinə kütləvi maneçilik törətməyin! Allah haqqı, sizlər Prezident İlham Əliyevin əsəbləri ilə zarafat edirsini! Ermənistanın öhdəsindən 44 günə gələn Ali Baş Komandan sizlərin öhdəsindən 4 dəqiqəyə gələcək!
Qısası, tədbir görün, vədinizi və sözünüzü tutun! Şəxsi əmlakımız “Azərbaycan” nəşriyyatının təmirini öhdəsinə götürmüş(hansı məmura məxsusdur, onu da bilirik) yem ola bilməz! Videoçəkilişlərimiz var, ədalətli olun! Biz Azərbaycan həqiqətlərini-haqq səsimizi təmənnasız olaraq dünyaya yayanlarıq! Sizlər isə bu haqqı tanımaq istəmirsinizsə, açıq deyin… Cavab gözləyirik!”.

Tezadlar.az