“Mediline” Tədris Mərkəzindən şikayət var.

Bu barədə Gununsesi.info-ya zərərçəkmiş vətəndaşdan daxil olan məlumatda deyilir.

“Sosial şəbəkədə “Mediline” Tədris Mərkəzi ilə bağlı reklam qarşıma çıxdı. Mərkəzlə əlaqə saxladıqdan sonra özünü operator kimi təqdim edən Nigar adlı xanım mənimlə danışaraq qeyri-peşəkar və manipulyativ üslubdan istifadə edərək emosional təsir yaratmağa çalışdı və məni kursa cəlb etdi. Kampaniya keçirildiyini, sınaq dərsinin ödənişsiz olduğunu, qısa müddətdə alman dilinin öyrədiləcəyini, müəllimlərin Almaniyada yaşayıb ixtisaslaşdığını və hətta Almaniyada işlə təminat imkanı olduğunu bildirərək məni inandırdılar.

Bakı şəhəri, Nəsimi rayonu, Mirqasımov küçəsi 2 ünvanında, Tibb Universitetinin yaxınlığında yerləşən kursa yaxınlaşdım. Qeyd edirəm ki, ilkin vədlər sonradan öz təsdiqini tapmadı. Alman dili kursu üçün 160 manat ödəniş etsəm də, bu ödənişə dair mənə nə qəbz təqdim olundu, nə də hər hansı rəsmi müqavilə bağlandı.

Qeyd olunan 1 aylıq proqram üzrə nəzərdə tutulan 12 dərsdən cəmi 3-4 dərsdə iştirak etmişəm. Lakin Tədris prosesi zamanı müşahidə etmişəm ki, davamiyyət şəffaf şəkildə aparılmır, dərslərdə iştirakım mənim imzamla təsdiqlənmir, birtərəfli qaydada şübhəli cədvəllər tərtib olunur və faktiki keçirilməyən dərslər mənim adıma “qayıb” kimi qeyd edilir.

Müəllim dərslərdə davamlı iştirak etməyib və əvəzləyici müəllim təmin olunmayıb”.

Vətəndaşın sözlərinə görə, dərs proqramı tam başa çatmadan ona “WhatsApp” tətbiqi vasitəsilə növbəti ödənişi etməyim tələb olunub:

“Həmin yazışmaları sübut kimi saxlayıram. Təqdim olunan məlumatlara görə, ödənişin rəsmi qaydada deyil, fiziki şəxs — Mirzəliyev Abbas Əli oğlunun adına olan bank kartına köçürülməsi tələb edilib. Bu hal qeyri-rəsmi maliyyə dövriyyəsi və vergi qanunvericiliyinin pozulması ehtimalını yaradır.

Bundan əlavə, hesab edirəm ki, tədris mərkəzinin fəaliyyətinin qanuni əsasları – lisenziya və rəsmi qeydiyyat məsələləri araşdırılmalıdır. Apardığım araşdırma zamanı bu fəaliyyətin qanuniliyini təsdiq edən hər hansı rəsmi sənədə rast gəlməmişəm. Məsələ ilə bağlı hüquq-mühafizə orqanlarına müraciət etmişəm. Topladığım materialları Nəsimi Rayon Polis İdarəsinin 20-ci Polis Bölməsinə təqdim etmişəm və fakt üzrə araşdırma aparılmasını tələb etmişəm.

Mən aldandım, amma istəyirəm ki, başqaları belə hallarla üzləşməsin. Tədris mərkəzlərinin vədlərinə inanarkən diqqətli olmaq lazımdır. Müəllimin diplomunu və dərs dediyi ixtisas üzrə lisenziyasını tələb etmədiyim üçün müxtəlif vədlərlə məni inandırdılar.

Bununla yanaşı, Azərbaycan Respublikasının İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə, Dövlət Vergi Xidmətinə və Elm və Təhsil Nazirliyinə elektron qaydada müraciət etmişəm.

Ümid edirəm ki, məsələ obyektiv araşdırılacaq, qanun pozuntularına hüquqi qiymət veriləcək və mənə dəymiş maddi ziyan ödəniləcək”.

Məsələ ilə bağlı Gununsesi.info-ya danışan hüquqşünas Xəyal Məmmədov bildirib ki, bu kimi hallarda vətəndaşlar ilkin mərhələdə bir sıra vacib hüquqi tələbləri yerinə yetirməlidirlər:

“İlk növbədə, kurs və ya tədris mərkəzi ilə mütləq yazılı müqavilə bağlanmalıdır. Müqavilədə xidmətin həcmi, müddəti, ödəniş məbləği və tərəflərin öhdəlikləri açıq şəkildə göstərilməlidir. Edilən hər bir ödəniş üzrə rəsmi qəbz və ya ödəniş sənədi tələb olunmalıdır.

Ödənişlərin yalnız hüquqi şəxsə məxsus rəsmi bank hesabınahəyata keçirilməsi tövsiyə olunur. Fiziki şəxslərin kartlarına yönləndirilən ödənişlər risklidir”.

Hüquqşünas əlavə edib ki, tədris prosesi ilə bağlı bütün yazışmalar, mesajlar və digər sübutlar mütləq saxlanılmalıdır:

“Xidmət keyfiyyətsiz olduqda və ya müqavilə şərtləri pozulduqda, vətəndaşlar əvvəlcə qarşı tərəfə yazılı pretenziyagöndərməli, nəticə əldə olunmadıqda isə müvafiq dövlət qurumlarına və məhkəməyə müraciət etməlidirlər”.

Xəyal Məmmədov qeyd edib ki, bu kimi hallarda vətəndaşlar daha diqqətli olmalı, xüsusilə “sürətli nəticə”, “iş təminatı” kimi vədlərlə təqdim olunan xidmətlərə qarşı ehtiyatlı yanaşmalıdırlar.(Gununsesi.info)