“İsmayıllı Yazarları” Ədəbi-İctimai Birliyinin nümayəndələri Daşkənddə Heydər Əliyev adına Azərbaycan Mədəniyyət Mərkəzini ziyarət ediblər
Özbəkistanda səfərdə olan bir qrup Azərbaycan yazarının tərkibində “İsmayıllı Yazarları” Ədəbi-İctimai Birliyinin nümayəndələri də Daşkənd şəhərində fəaliyyət göstərən, Azərbaycanın Özbəkistandakı Səfirliyinin tabeliyində olan Heydər Əliyev adına Azərbaycan Mədəniyyət Mərkəzini ziyarət ediblər.
Qonaqlara Mədəniyyət Mərkəzinin fəaliyyəti, Azərbaycan mədəniyyətinin, ədəbiyyatının və tarixinin Özbəkistanda təbliği istiqamətində həyata keçirilən layihələr, eləcə də mərkəzin kitabxanası və digər bölmələri barədə ətraflı məlumat verilib.
Görüş zamanı “İsmayıllı Yazarları” Ədəbi-İctimai Birliyinin nümayəndələri müəllifi olduqları kitabları Heydər Əliyev adına Azərbaycan Mədəniyyət Mərkəzinin kitabxanasına hədiyyə ediblər. Hədiyyə olunan nəşrlərin Azərbaycan ədəbiyyatının Özbəkistanda tanıdılması, oxucuların müasir Azərbaycan yazarlarının yaradıcılığı ilə yaxından tanış olması baxımından əhəmiyyət daşıdığı vurğulanıb.
Səfər çərçivəsində keçirilən görüş Azərbaycan və Özbəkistan arasında ədəbi-mədəni əlaqələrin möhkəmləndirilməsi, yazıçılar arasında əməkdaşlığın genişləndirilməsi və ortaq türk mədəni irsinin təbliği istiqamətində növbəti mühüm addım kimi dəyərləndirilib.
