TIF-in prezidenti: "Fars körfəzi Türk dövlətləri regionu üçün uzunmüddətli investisiyaların mühüm mənbəyinə çevrilə bilər"
Türk İnvestisiya Fondu (TIF) Körfəz ölkələrinin suveren investisiya fondları və inkişaf institutları ilə əməkdaşlığı genişləndirir.
Bunu "Report"a müsahibəsində TIF-in prezidenti Bağdad Amreyev bildirib.
"Bu yaxınlarda Küveytə səfərim çərçivəsində Küveyt İnvestisiya İdarəsi, Küveyt Ərəb İqtisadi İnkişaf Fondu və Ərəb İqtisadi və Sosial İnkişaf Fondunda görüşlər keçirdim. Biz layihələrin birgə maliyyələşdirilməsi, TIF-ə üzv dövlətlərə investisiyaların cəlb edilməsi və Ərəb Koordinasiya Qrupu ilə əməkdaşlığın daha sıx şəkildə inkişaf etdirilməsi imkanlarını müzakirə etdik", – B.Amreyev vurğulayıb.
O, bu il Körfəz ölkələrində Qətər İnvestisiya İdarəsi, Qətər İnkişaf Fondu və Səudiyyə İnkişaf Fondu kimi institutlarla da danışıqlar aparıldığını bildirib.
"Növbəti addım qarşılıqlı iqtisadi maraq kəsb edən az sayda layihənin seçilməsi olacaq. Əminəm ki, Körfəz ölkələri Türk dövlətləri regionunda uzunmüddətli investisiyaların və inkişaf layihələrinin maliyyələşdirilməsinin mühüm mənbəyinə çevrilə bilər", - Fondun prezidenti əlavə edib.
Müsahibənin tam mətni ilə bu link vasitəsilə tanış ola bilərsiniz.
