Teatrın əşyaları direktorun bağ evində ... - bura da talan edilir?
Teatrın əşyaları direktorun bağ evində ... - Cəfər Cabbarlı adına İrəvan Dövlət Azərbaycan Dram Teatrının inventarları yanğın hadisəsi zamanı məhv olub.
Bu barədə Qlobal.az-ın əldə etdiyi məlumatda bildirilir.
Məlumata görə yanğın hadisəsi teatrın direktoru İftixar Piriyevin bağ evində baş verib.
Hadisə yerinə gələn Fövqəladə Hallar Nazirliyinin Dövlət Yanğın Nəzarəti Xidməti isə yanğın hadisəsinin nədən qaynaqlandığı barədə akt tərtib etmədiyi iddia edilir.
İlginc məqamlardan biri İrəvan Dövlət Azərbaycan Dram Teatrına məxsus inventarların teatrın direktorunun bağ evində saxlanmasıdır.
Dövlət başçısının sərəncami ilə təmirinə milyonlarla vəsait xərclənmiş İrəvan Dövlət Azərbaycan Dram Teatrının böyük bazası olduğu halda inventarların nə üçün direktorun bağ evinə aparılması və sonradan yanması bir sıra suallar yaradır.
Qlobal.az yanğın hadisəsi ilə bağlı Mədəniyyət nazirliyi və Fövqaladə Hallar Nazirliyindən mövqe öyrənməyə çalışıb.
Hər iki nazirlik məsələ ilə bağlı açıqlama vermədi.
İrəvan Dövlət Azərbaycan Dram Teatrı da hadisə barədə mövqe bildirməyib.
