“Velosiped zolaqlarının çəkilməsinə yeniyetmələrin və gənclərin əyləncə, idman, istirahət təminatı kimi yanaşılır”.

Bu fikirləri Bakının mərkəzi və ətraf küçələrində çəkilən velosiped yollarının minik avtobilləri tərəfindən “zəbt olunması” haqda danışan nəqliyyat məsələləri üzrə ekspert Aslan Əsədov Yenicag.az-a açıqlamasında deyib.

Onun sözlərinə görə, velosiped yollarının çəkilişində nəqliyyat infrastrukturunun buna imkan verib-verməməsi mütləq nəzərə alınmalıdır:

“Azadlıq prospektinin Füzuli küçəsi ilə kəsişməsində və digər ətraf küçələrdə xüsusi velosiped zolaqlarının çəkilişi davam etdirilir. Ümumiyyətlə, cəmiyyətdə bu zolaqların çəkilməsinə yeniyetmələrin və gənclərin əyləncə, idman, istirahət təminatı kimi yanaşılır. Fikrimcə bu yanaşma doğru deyil. Çünki velosiped yolları layihəsi xarici təcrübənin Azərbaycana gətirilməsi ilə əlaqədardır.

Eyni zamanda, Bakıda velosiped yolları layihəsinin icrasına nəqliyyat infrastrukturunun imkan verib-verməməsi də mütləq nəzərə alınmalıdır. Bu hələ ki cavabsız qalan əsas suallardan biridir. Bəzən biz velosiped və skuterlər üçün ayrılmış yollarda qanunsuz olaraq minik avtomobillərinin parklandığını görə bilirik. Əgər çəkilmiş velosiped yolunda avtomobillər park ediləcəksə, bu yolun çəkilməsinin anlamı qalır.

Ona görə də bu məsələlər təkrar-təkrar analiz edilərək yoxlanılmalıdır. Bəs bu qədər cərimənin tətbiq olunmasına baxmayaraq, avtomobillər niyə eyni səhvə yol verirlər? Mahiyyət ondan ibarətdir ki, sürücülər parklanmaya icazə verilib-verilməməsinə baxmayaraq, avtomobili mümkün olan istədikləri yerdə saxlayırlar. Bu da Bakıda avtomobillərin sayının çox olması və onlar üçün parklanma yerlərinin azlığı ilə əlaqədardır”.