İş adamı Ramil Aslanov Gömrükdə özbaşınalıqla bağlı Prezidentə müraciət etdi - VİDEO
Bu müraciətin məqsəd və məramı, Bakı Baş Gömrük İdarəsində və dövlətin gömrük sistemində baş verən qanunsuz fəaliyyətlərə qarşı ciddi narazılıq və şikayətin bildirilməsi ilə əlaqədardır. Müraciətdə, xüsusən Bakı Baş Gömrük İdarəsindəki bəzi məmurların qanunsuz hərəkətlərindən və şikayətçi şəxsə qarşı şəxsi qərəzli yanaşmalardan bəhs edilir. Şikayətçi, gömrük prosedurlarının düzgün tətbiq edilmədiyini və məmurların qanunsuz olaraq qiymət manipulyasiyaları apardıqlarını iddia edir.
Müraciət, həmçinin bu qanunsuzluqlarla bağlı hüquqi mübarizəni davam etdirəcəyini vurğulayır və bu prosesdə cənab Prezidentin dəstəyinə ehtiyac duyulduğunu qeyd edir. Şikayətçi, Ramil Aslanov Bakı Baş Gömrük İdarəsinin rəhbəri Elmir Ramazanovun fəaliyyətinə qarşı ittihamlar irəli sürür və müvafiq hüquq mühafizə orqanlarına xüsusi göstəriş verilərək məsələnin həll edilməsini tələb edir.
Müraciətin ümumi məqsədi, iqtisadiyyata və dövlətin qanunlarına zidd hərəkət edən gömrük məmurlarının fəaliyyətini ifşa etmək və bu cür qanunsuzluqları aradan qaldırmaqdır. Bu məqsədlə, şikayətçi Prezidentdən bu məsələyə müdaxilə etməsini xahiş edir.
İş adamı Ramil Aslanovun Prezident İlham Əliyevə ünvanladığı məktubu olduğu kimi sizlərə təqdim edirik:
Hörmətli cənab Prezident,
Çox saylı müraciətlərimlə Sizə bildirdiyim kimi Bakı Baş Gömrük İdarəsində rəhbəri olduğum şirkətə qarşı baş verən qanunsuzluqlar, süni əngəllər, məmur özbaşnalığı nəticəsində yaranan süründürməçiliklər və açıq-aşkar, şəxsi prinsip zəmnində qurulmuş “oyunlar” nümayişkaranə şəkildə hələdə davam etməkdədir.
Hörmətli cənab Prezident, ümüdüm yalnız Sizədir, bilirəm ki, Siz ölkəmizdə qanunun aliliyini təmin edən bir lidersiniz. Elə bu səbəbdən də öz problemlərimlə Sizi mütəmadi olaraq narahat edirəm.
Belə ki, Çin Xalq Respublikasından idxal etdiyim mallar 31.07.2024-cü il tarixli 01241000304074 nömrəli və 29.07.2024-cü il tarixli 01241000300384 nömrəli gömrük bəyannamələri ilə Bakı Baş Gömrük İdarəsində sərbəst dövriyyə üçün buraxılış gömrük prosedurunda gömrük rəsmiləşdirilməsindən keçirilmiş və hər iki gömrük bəyannaməsi üzrə mallar buraxılaraq bəyannamələr arxivləşdirilmişdir. Lakin buna baxmayaraq Bakı Baş Gömrük İdarəsinin mənə qarşı qurduğu ədalətsiz “oyunlar” nəticəsində qanunsuz materiallar toplanaraq Dövlət Gömrük Komitəsinin Əməliyyat-İstintaq Baş İdarəsinə göndərilmiş və hal hazırda bu məsələ ilə bağlı mənə hələ də hədə-qorxu gəlinir. Şirkətimə edilmiş haqsızlıqlarla bağlı Azərbaycan Respublikası Dövlət Gömrük Komitəsinin Əməliyyat-İstintaq Baş İdarəsinə etdiyim 05.08.2024-cü il tarixli L20/24, 13.08.2024-cü il tarixli L27/24, 15.08.2024-cü il tarixli L28/24, 23.08.2024-cü il tarixli L35/24 və 12.09. 2024-cü il tarixli L38/24 nömrəli şikayət məktublarıma belə bu günədək baxılmamışdır.
Malların tam şəkildə gömrük rəsmiləşdirilməsindən keçirilməsi və buraxılması prosesindən 5 aydan artıq müddət keçsə də, guya malların gömrük dəyərinin düzgün bəyan olunmadığı barədə cəfəng iddia ortaya atılaraq mənimlə “qiymət sövdələşməsi” aparılmağa çalışılır. Əgər malların gömrük dəyəri tərəfimizdən düzgün bəyan edilməmişdirsə, necə ola bilər ki, bu hal malların gömrük rəsmiləşdirilməsindən keçirilməsi və gömrük nəzarəti altında buraxılması proseslərində aşkar olunmasın? Bəs bu proseslər zamanı Azərbaycan Respublikası Dövlət Gömrük Komitəsinin süni intelekt əsasında işləyən avtomatlaşdırılmış sistemi görəsən necə işləyirdi? Necə ola bilər ki, gömrük nəzarətindən keçirilərək buraxılışı verilmiş mallara dair Bakı Baş Gömrük İdarəsi uydyrma iddialar əsasında sonradan araşdırma başlayaraq materialları istintaq orqanına göndərir? Bunun adı şəxsi qərəzlilik prinsipi deyilsə bəs nədir?
Göründüyü kimi, yenə də gömrük orqanının vəzifəli şəxsləri başda Bakı Baş Gömrük İdarəsinin rəisi Elmir Ramazanov olmaqla öz yaxınları olan xarici iqtisadi fəaliyyət iştirakçılarına şərait yaratmaq üçün mənim kimi dürüst sahibkarları sıxışdırmaq niyyətindədirlər. Bu kimi qanunsuz hərəkətlər nəticəsində vəzifə həddini açıq aşkar surətdə aşan gömrük məmurları mənim kimi hüquqlarını bilən sahibkarlara əzab-əziyyət verərək düzgün bəyan edilmiş malların dəyərini süni şəkildə qaldırıldıqdan sonra haqsız rəqabətə yol açır.
Möhtərəm Prezident!
Mən bundan əvvəlki məktublarımda da qeyd etmişdim, indi də təkrar olaraq vurğulamaq istəyirəm ki, Sizin iqtisadiyyatımızın inkişafı ilə bağlı müəyyən etdiyiniz yoldan dönməyərək Sizin yürütdüyünüz siyasətə daim sadiq olacağam və ölkəmizdə mövcud bürokratlara, rüşvətxorlara, korrupsiya əməllərinə qarşı mübarizəmi apararaq, Elmir Razmazanov kimi dövlət məmurlarının fəaliyyətlərini ifşa etməkdə davam edəcəyəm. Lakin bu kimi qanunsuzluqlarla mübarizə zamanı bizim Sizin kimi Liderin dəstəyinə ehtiyacımız var. Ümüdümüz Sizədir cənab Prezident. Bir daha Sizdən xahiş edirəm ki, Bakı Baş Gömrük İdarəsində iş adamlarına qarşı Elmir Ramazanovun rəhbərliyi ilə həyata keçirilən qanunsuzluqların, gömrük orqanlarının istintaq idarəsində davam edən özbaşnalıqların aradan qaldırılması ilə bağlı tədbirlərin həyata keçirilməsi ilə əlqədar müvafiq hüquq mühafizə orqanlarına xüsusi göstəriş verəsiniz.
Əvvəlcədən Sizə öz minnətdarlığımı bildirirəm.(BakuNews.az)
Dərin hörmətlə, Ramil Aslanov
