Son dövrlər sosial şəbəkələrdə və bəzi xəbər portallarında “Uğur 777” estetik klinikası ilə bağlı yayılan narazılıqlar ictimaiyyətin diqqətini cəlb edib. Xüsusilə klinikanın rəhbəri, estetik və cərrahiyə sahəsində fəaliyyət göstərən Xəyalə xanımın fəaliyyəti ilə bağlı ortaya çıxan iddialar, həm peşəkar tibbi yanaşma, həm də pasiyent hüquqları baxımından ciddi suallar doğurur.

Müxtəlif vətəndaşların verdiyi ifadələrdə bir neçə ortaq məqam var: qeyri-peşəkar müdaxilələr, prosedur sonrası ağırlaşmalar, vədin verilib yerinə yetirilməyən nəticələr və şikayətləri dinləmək yerinə, susdurulmağa çalışılmaları.

“Özümü güvənli əllərdə hiss etmişdim, amma nəticə dəhşət idi”

Heqiqixeber.az xəbər verir ki, adının açıqlanmasını istəməyən bir pasiyentin sözlərinə görə, klinikada burnuna estetik müdaxilə edilib, lakin əməliyyatdan sonra burnunda ciddi çökəklik və nəfəsalma problemi yaranıb. Müraciət etdikdə isə cavab olaraq “adaptasiya dövrüdür” deyilib. Pasiyent deyir ki, bu cavab bir neçə ay çəkdi, amma vəziyyəti daha da pisləşdi: “Nəfəs ala bilmirdim. Digər həkimlərə getdim, dedilər ki, struktur bərbad formadadır. İndi düzəlməsi üçün ikinci dəfə əməliyyata getməliyəm. Həm mənəvi, həm maddi sarsıntı yaşadım.”

“Dodaqlarımda sinir zədələnməsi oldu”

Başqa bir pasiyent isə dolğu proseduru zamanı sinir sisteminə zədə vurulduğunu iddia edir. “Dodağımın bir tərəfi 6 aydır hərəkət etmir. Gülə bilmirəm, danışanda hiss edirlər. Bu problemi izah etməyə çalışanda isə məni qınadılar ki, bədənim uyğunsuz reaksiya verib. Bəs bu zaman diaqnoz niyə düzgün qoyulmayıb?”

Tənqidlərə cavab əvəzinə təhdidmi edilir?

Şikayətçilərin bir çoxu onu da qeyd edir ki, narazılıqlarını sosial mediada bildirmək istədikdə onlara təhdid dolu mesajlar göndərilib və hüquqi məsuliyyətlə qorxudulublar. Bəzi şəxslərə isə 147-148-ci maddələr (böhtan və təhqir) ilə məhkəməyə veriləcəkləri bildirilib.
Bəs sual yaranır: əgər vətəndaşlar doğrudan da sağlamlıqlarında problem yaşayıblarsa, niyə səs qaldırdıqları üçün susdurulurlar? Prezident İlham Əliyev dəfələrlə vurğulayıb ki, sahibkarlara şərait yaradılır ki, onlar xalqa keyfiyyətli xidmət göstərsinlər, yoxsa millətin sağlamlığını təhdid altına alsınlar deyə yox!

Dövlət nəzarəti və cavabdehlik

Məsələnin digər tərəfi isə aidiyyəti qurumların nəzarət mexanizmidir. Estetik və cərrahiyə xidmətləri göstərən klinikaların lisenziyası, çalışan həkimlərin diplomu, təcrübəsi, prosedurların standartlara uyğunluğu ciddi şəkildə yoxlanılmalıdır. Bu kimi narazılıqlar artdıqca, Səhiyyə Nazirliyi, İcbari Tibbi Sığorta Agentliyi və digər nəzarət qurumları hərəkətə keçməli, yoxlamalar aparmalıdır.

“Həkim andı harada qaldı?”

Pasiyentlər onu da qeyd edir ki, Xəyalə xanım özünü mediada “xeyriyyəçi həkim”, “ictimaiyyətin etimadını qazanmış peşəkar” kimi təqdim edir, lakin gerçək təcrübələr tamam başqa mənzərə yaradır. “Həkim andı var: birinci xəstəyə zərər vermə. Əgər bu prinsip pozulursa, peşəkarlıqdan danışmaq olmur,” – deyə bir şikayətçi bildirir.

Jurnalistlərin mövqeyi və obyektivlik problemi

Şikayət edənlər arasında medianın da bəzi nümayəndələrinə irad var. Onlar deyirlər ki, bəzi jurnalistlər klinikanın adını təmizə çıxarmağa çalışır, ya da şikayətləri görməməzlikdən gəlir. “Bəlkə özləri də orada xidmət alıblar, amma biz zərər görmüş insanlarıq. Səsimizi çatdırmağa çalışanlar niyə susur?” – deyə bir qadın vurğulayır.

Sonda: məsələ ciddidir, araşdırılmalıdır

“Uğur 777” klinikasında baş verənlərlə bağlı ortada real narahatlıqlar, faktlar və etiraflar var. Bu kimi halların ictimailəşdirilməsi nə kiminsə imicinə zərər vurmaq üçün, nə də sensasiya yaratmaq üçündür. Bu, birbaşa insan sağlamlığı ilə bağlı məsələdir. Dövlət qurumları və media bu məsələyə obyektiv yanaşmalı, həm klinika rəhbərliyinin mövqeyini dinləməli, həm də zərərçəkmişlərin səslərinə səs verməlidir.
Əgər ortada heç bir problem yoxdursa, obyektiv araşdırma aparılsın, hər iki tərəf danışsın. Amma əgər şikayətlər doğru çıxarsa, o zaman həm hüquqi, həm də etik müstəvidə ciddi məsuliyyət ortaya çıxacaq.
Unutmayaq ki, səhiyyə sahəsi insan həyatını əhatə edir və burada səhvlərin “üzr istəyirik”lə bağlanması mümkün deyil. Hər bir vətəndaşın sağlamlığı dövlətin və cəmiyyətin maraq dairəsində olmalıdır.(Heqiqixeber.az)

Qarşı tərəfin mövqeyini tanıyırıq.