05.05.2026-cı il tarixində vətəndaş Gülbadə Abdullayevanın 1 saylı Şəhər Klinik Tibbi Mərkəzinə yerləşdirilməsi ilə bağlı yayılan məlumatlar ətrafında müzakirələr davam edir.

İlkin mərhələdə hadisənin intihara cəhd olduğu ilə bağlı məlumatlar yayılsa da, daha sonra bəzi media qurumlarına Klinik Tibbi Mərkəz tərəfindən “ürəkbulanma” və “halsızlıq” diaqnozu ilə bağlı açıqlama verilməsi ictimaiyyətdə ciddi suallar doğurub.

Məsələnin diqqət çəkən tərəflərindən biri isə 103 Təcili Tibbi Yardım xidməti, 102 qaynar xətti və media qurumlarına təqdim edilən məlumatlar arasında fərqlərin olmasıdır. Bu ziddiyyət sosial şəbəkələrdə və ictimai müzakirələrdə geniş rezonans yaradıb.

BNTV.az olaraq, Gülbadə Abdullayevanın təkidi ilə məsələnin mahiyyətini dəqiqləşdirmək məqsədilə 1 saylı Şəhər Klinik Tibbi Mərkəzinin mətbuat katibi Ruzbeh Məmmədə rəsmi sorğu ünvanladıq. Lakin mətbuat katibi sorğunu cavablandırmaqdan imtina etdi.

Ruzbeh Məmməd bildirib ki, məsələ ilə bağlı artıq Gülbadə Abdullayevanın meneceri Fatimə Mahmudova ilə danışıb və əlavə açıqlama verməyəcək.

Halbuki Fatimə Mahmudovanın redaksiyamıza təqdim etdiyi səs yazısında, onun Ruzbeh Məmmədlə apardığı telefon danışığının yer aldığı bildirilir. İddialara görə, həmin danışıq zamanı media qurumlarına niyə fərqli məlumat verildiyi soruşulduqda, mətbuat katibi açıqlamanın rəhbərliyin tövsiyəsi əsasında təqdim edildiyini bildirib.

Eyni zamanda, Fatimə Mahmudovanın sözlərinə görə, danışıq əsnasında rəsmi sorğu təqdim ediləcəyi halda məsələyə dair düzgün və ətraflı məlumat veriləcəyi qeyd edilsə də, sonradan BNTV.az tərəfindən göndərilən sorğu cavabsız saxlanılıb.

Bu isə ictimaiyyətdə əlavə suallar yaradıb. Xüsusilə də zərərçəkən tərəfin yaxınlarının hadisənin olduğu kimi ictimaiyyətə çatdırılmasına etiraz etmədiyi bildirildiyi halda, intihara cəhd iddialarının “ürəkbulanma” və “halsızlıq” kimi təqdim olunmasının səbəbi maraq doğurur.

Hazırda əsas müzakirə olunan məqamlardan biri də budur: 1 saylı Şəhər Klinik Tibbi Mərkəzi hansı səbəbdən hadisənin mahiyyətindən fərqli açıqlama verməyə ehtiyac duyub və burada hər hansı maraqlı tərəfin təsiri olubmu?

Fatimə Mahmudova redaksiyamıza təqdim etdiyi danışıq səs yazısının ictimaiyyətin düzgün məlumatlandırılması məqsədi daşıdığını bildirərək, yayılan məlumatların niyə indiyədək təkzib və ya düzəliş edilmədiyi sualını gündəmə gətirib.

Qeyd edək ki, BNTV.az qarşı tərəfin mövqeyini dərc etməyə hazırdır.

Sonda isə Fatimə Mahmudova və Gülbadə Abdullayeva şəxsi məlumatlarla bağlı hədə-qorxu iddiası üzrə polisə müraciət etdiyin deyir.

Fatimə Mahmudovanın bildirdiyinə görə, klinikanın video materiallarının media qurumlarında yayımlanması ilə bağlı hər hansı problem və ya şikayət mövcud deyil.

Onun sözlərinə əsasən, əsas narahatlıq Gülbadə Abdullayevaya məxsus şəxsi məlumatların bir neçə jurnalist tərəfindən ictimailəşdiriləcəyi ilə bağlı hədə və təzyiq xarakterli vəziyyətlə bağlıdır.

Fatimə Mahmudova iddia edir ki, həmin şəxsi məlumatların yayılacağı ilə bağlı hədələr fonunda dərhal hüquq-mühafizə orqanlarına, Nəsimi Rayon Polis İdarəsinə müraciət edilib.

Hazırda məsələ üzrə polis orqanları tərəfindən araşdırma aparıldığı bildirilir.