KİV: Ukrayna və Rusiya nümayəndələrinin danışıqlar zamanı dost kimi görünürdülər
ABŞ, Rusiya və Ukrayna arasında Əbu-Dabidə keçirilən üçtərəfli danışıqlar “məhsuldar” olub və “dostyana” atmosferdə keçib.
Bu barədə Axios öz mənbələrinə istinadən məlumat yayıb.
Qeyd olunur ki, danışıqlar həm amerikalı vasitəçilərin Rusiya və Ukrayna nümayəndələri ilə ayrı-ayrılıqda birgə görüşlərini, həm də amerikalıların iştirakı olmadan ruslar və ukraynalılar arasında birbaşa görüşü əhatə edib.
“Hamısı müzakirə olundu. Heç bir tərəf müzakirənin gedişindən narahat deyildi. Biz müzakirədən heç bir məsələni kənarda qoymadıq və heç kimi sövq etməyə ehtiyac olmadı. Zalda qarşılıqlı hörmət gördük, çünki insanlar həqiqətən həll yolları axtarırdılar”, – deyə ABŞ rəsmilərindən biri bildirib.
Danışıqların ikinci gününün sonunda üç qrup birlikdə nahar edib.
“Bir məqamda hamı demək olar ki, dost kimi görünürdü. Məndə ümid hissi yarandı”, – deyə həmin amerikalı rəsmi əlavə edib.
Qeyd edək ki, bundan əvvəl Ukrayna prezidenti Volodimir Zelenski Əbu-Dabidə keçirilən danışıqların ilkin nəticələri barədə məlumat vermişdi. Onun sözlərinə görə, müzakirələrin əsas diqqət mərkəzi müharibənin bitməsi üçün mümkün parametrlər olub.
