Respublika Təcili və Təxirəsalınmaz Tibbi Yardım Mərkəzi publik hüqauqi şəxsi “İveco Daily 35S 15/E4 V/P” markalı təcili yardım avtomaşınların cari təmiri üçün tələb olunan ehtiyat hissələrinin satınalınması üzrə 11.09.2025-ci ildə başladığı açıq tenderə yekun vurub. Müsabiqənin qalibi “AZ-TEX-IMPORT” Məhdud Məsuliyyətli Cəmiyyəti seçilib və tərəflər arasında 960.096,65 manat məbləğində satınalma müqaviləsi bağlanılıb.

Bundan əlavə Təcili və Təxirəsalınmaz Tibbi Yardım Mərkəzi “İveco Daily 35S 15/E4 V/P” markalı təcili yardım avtomaşınların əsaslı təmiri üçün tələb olunan ehtiyat hissələrinin satınalınması üzrə 29.07.2025-ci ildə başladığı açıq tenderə də yekun vurub. Bu müsabiqənin də qalibi “AZ-TEX-IMPORT” Məhdud Məsuliyyətli Cəmiyyəti seçilib və tərəflər arasında 600.646 manat məbləğində satınalma müqaviləsi bağlanılıb. Məlumatlar satınalmaların portalında 19.11.2025-ci ildə dərc edilib.

Göründüyü kimi, Təcili və Təxirəsalınmaz Tibbi Yardım Mərkəzi iyul ayının sonu, sentyabr ayının əvvəllərində başladığı, 40-45-gün ərzində təşkil etdiyi satınalma prosudurunun ikisində də “AZ-TEX-IMPORT” MMC-ni qalib seçib və ümumi dəyəri 1 560 742 manat olan iki satınalma müqaviləsi bağlayıb.

Satınalmaların portalı üzərindən apardığımız araşdırmada məlum oldu ki, Təcili və Təxirəsalınmaz Tibbi Yardım Mərkəzi “AZ-TEX-IMPORT” MMC ilə “İveco Daily 35S 15/E4 V/P” markalı təcili yardım avtomaşınların cari təmiri üçün tələb olunan ehtiyat hissələrinin və mühərrik yağının satınalınması üzrə 584.820,94 manat dəyərində bir müqavilə 16.01.2025-ci ildə, “İveco Daily 35S 15/E4 V/P” markalı təcili yardım avtomaşınların əsaslı təmiri üçün tələb olunan ehtiyat hissələrinin satınalınması üzrə 204.761,1 manat dəyərində bir müqavilə də 03.12.2024-cü ildə bağlayıb. Bu da son 11 ayda “İveco Daily 35S 15/E4 V/P” markalı avtomobillərin ehtiyyat hissələrinə 2 350 305 manat vəsaitin xərclənməsi deməkdir.

İndi gəlin görək Təcili və Təxirəsalınmaz Tibbi Yardım Mərkəzi “AZ-TEX-IMPORT” MMC-dən nə kimi ehtiyyat hissələri alır.

Mərkəz 03.12.2024-cü ildə müqavilə bağladığı 96245 nömrəli müsabiqənin şərtlərinə görə adıgedən markalı təcili yardım avtomaşınları üçün 20 ədəd farsunka, 30 ədəd mühərriyin uzun sep dəsti, 30 ədəd mühərriyin başmaq dəsti, 10 ədəd ön fara, 10 ədəd arxa haca yastığı və digər ehtiyyat hissələri.

Mərkəzin 16.01.2025-ci ildə müqavilə bağladığı 94133 nömrəli müsabiqənin şərtlərinə görə 800 ədəd yağ filtri, 300 ədəd hava filtri, 150 yanacaq,300 ədəd süzgəcli yanacaq filtri, 30 ədəd şüşə silgəci, 10 ədəd ön, 10 ədəd arxa amartizator və digər ehtiyyat hissələri.

Mərkəzin 19.11.2025-ci ildə müqavilə bağladığı 116024 nömrəli müsabiqənin şərtlərinə görə 30 ədəd generator, 30 ədəd farsunka, 50 ədəd mühərriyin uzun, 50 ədəd qısa sep dəsti və digər ehtiyyat hissələri.

Mərkəzin 19.11.2025-ci ildə müqavilə bağladığı 118896 nömrəli müsabiqənin şərtlərinə görə 100 ədəd şüşə silgəci, 30 ədəd yağ radiatoru, 50 ədəd hava yastığının hava filtri, hər birindən 400 ədəd kalotka sensoru arxa və ön, 600 ədəd süzgəcli yanacaq filtri, hər birindən 500 ədəd kondisioner və hava filtri, 300 ədəd yanacaq filtri, 1500 ədəd yağ filtri və digər ehtiyyat hissələri.

Qeyd edək ki, Təcili və Təxirəsalınmaz Tibbi Yardım Mərkəzinin ehtiyyat hissələri aldığı “İveco Daily 35S markalı avtomobillər ölkəyə ötən il gətirilib. Prezident İlham Əliyev 16.03.2024-cü ildə İcbari Tibbi Sığorta üzrə Dövlət Agentliyi tərəfindən alınmış müasir təcili tibbi yardım avtomobilləri ilə tanış olub. Agentliyin İdarə Heyətinin sədri Zaur Əliyev yeni ambulanslar barədə dövlət başçısına məlumat verərək bildirilib ki, ambulansların alınmasında məqsəd əhaliyə göstərilən təcili və təxirəsalınmaz tibbi yardım xidmətinin keyfiyyətini yaxşılaşdırmaqdır. Qeyd olunub ki, İtaliyanın “Iveco Daily 35S15/E4” markalı 100 ədəd təcili tibbi yardım avtomobilindən 66-sı sadə differensialı, 3-ü psixiatrik, 20-si reanimobil, 1-i portativ rentgen aparatlı və 10-u perinatal küvəzlidir. Zaur Əliyev bildirib ki, icbari tibbi sığortanın tətbiqindən sonra ümumilikdə 349 ambulans alınıb.

Bu məlumatlardan da göründüyü kimi “İveco Daily 35S 15/E4 V/P” markalı təcili yardım avtomobillərin istismara verilməsinin heç iki ili tamam olmayıb. “Tibbi Ərazi Bölmələrini İdarəetmə Birliyi” bu avtomobilləri təbii ki, zəmanətlə alıb. Rəsmi distribüter və dilerlər özlərinin zəmanət şərtləri olur. Zəmanət şərti isə müəyyən illəri və yürüşü əhatə edə bilər. Məsələn, 3 il və ya 150.000 km zəmanət. Bunlardan hansı tez bitərsə, həmin zaman da zəmanət qurtarmış hesab olunur. Maraqlıdır, TƏBİB təcili tibbi yardım avtomobillərini neçə illik zəmanətlə və hansı şərtlərlə alıb?

Digər maraqlı nüans alınan ehtiyyat hissələri ilə bağlıdır. Məsələn Təcili və Təxirəsalınmaz Tibbi Yardım Mərkəzi son yanvar ayından sonra 800 ədəd yağ filtiri alıb. Son tenderdə isə 1500 ədəd yağ filtri sifariş edib. Bu 10 ayda 2300 ədəd yağ filtiri alınması deməkdir.

Yağ filterlərinin istifadə müddəti avtomobil istehsalçısının tövsiyələrinə əsasən hər 10-15 000 kilometrdə bir dəfə dəyişdirilməlidir. Lakin bu müddət avtomobilin istismar şəraitindən asılı olaraq 6-10 000 kilometrə qədər qısala bilər. Xüsusilə, çətin şəraitdə (yüksək temperatur, dağlıq yollar, sıx şəhər tıxacları) istifadə edildikdə filtr daha tez dəyişdirilməlidir.

Qeyd edək ki, Təcili və Təxirəsalınmaz Tibbi Yardım Mərkəzinin balansındakı “Iveco Daily 35S15/E4” markalı təcili yardım avtomobillərinin sayı dəqiq məlum olmadığından alınan yağ filterlərinin neçə avtomobil və neçə aydan bir dəyişdirilməsi üçün nəzərdə tutulduğunu da müəyyən etmək mümkün olmadı.

Bütün bunlara baxmayaraq xüsusilə qeyd edilməlidir ki, təcili yardım avtomobillərinin əksəriyyəti yenidir. Mediada 30.08.2023-cü ildə yayılan məlumatlara görə “İcbari Tibbi Sığorta üzrə Dövlət Agentliyi” publik hüquqi şəxs “AZ-TEX-İmport” MMC ilə “Yeni müasir tibbi avadanlıq kompleksləri ilə təchiz olunmuş 80 ədəd təcili tibbi yardım avtomobillərinin” satın alınması üzrə 15 424 092 manat dəyərində müqavilə bağlayıb. Avtomobilin biri dövlət qurumuna 193 min manata başa gəlib.

“Tibbi Ərazi Bölmələrini İdarəetmə Birliyi” nə tabeli “İnnovasiya və Təchizat Mərkəzi” publik hüquqi şəxsi 15.11.2024-cü ildə “Yeni müasir tibbi avadanlıq kompleksləri ilə təchiz olunmuş 80 ədəd təcili tibbi yardım avtomobilləri”nin satın alınması üzrə “AZ-TEX-IMPORT” Məhdud Məsuliyyətli Cəmiyyəti ilə 15.874.715 manat məbləğində satınalma müqaviləsi bağlayıb.

Göründüyü kimi Təcili və Təxirəsalınmaz Tibbi Yardım Mərkəzinin balansında olan təcili yardım avtomobillərinin əksəriyyəti yenidir. Belə olan halda son 10 ayda “İveco Daily 35S 15/E4 V/P” markalı təcili yardım avtomaşınların cari təmiri üçün tələb olunan ehtiyat hissələrinin satın alınmasına 2 350 305 manat dövlət vəsaitin xərclənməsi hansı zərurətdən yaranıb?

Qeyd edək ki, “Az-Tex-İmport” MMC Sumqayıt Texnologiyalar Parkının rezident şirkəti tanınır. Dövlət Vergi Xidmətinin reyestr məlumatlarına görə “Az-Tex-İmport” MMC 19 iyul 2017-ci ildə qeydiyyata alınıb. Nizamnamə kapitalı 226 010 manatdır. Hüqüqi ünvanı Bakı şəhəri Xətai rayonu, Telnov küçəsi, ev 2347/48 mənzil 290-da yerləşən “Az-Tex-İmport” MMC-nin qanuni təmsilçisi İbadullayev İlkin Sahib oğludur. Açıq mənbələrdə İlkin İbadullayev haqqında heç bir məlumata rast gəlinmir.

Bütün bu məlumatlardan da göründüyü kimi, “Az-Tex-İmport” MMC “İcbari Tibbi Sığorta üzrə Dövlət Agentliyi”nə və “Tibbi Ərazi Bölmələrini İdarəetmə Birliyi”nə təcili yardım avtomobilləri, Təcili və Təxirəsalınmaz Tibbi Yardım Mərkəzinə isə həmin avtomobillərin ehtiyat hissələrini satır. Üstündən heç bir il keçmədiyi halda.
Qeyd edək ki, Respublika Təcili və Təxirəsalınmaz Tibbi Yardım Mərkəzinin direktoru Mirələm Caləlovdu. O, mərkəzə 2023-cü ildən rəhbərlik edir.Aktualinfo.net