Rusiya Kiyevə və ətraf bölgəyə kütləvi hücumlar edib, xəsarət alanlar var
Rusiya gecə boyu Ukraynaya dronlar və ballistik raketlərlə hücum edərək Kiyevdə və ətraf bölgədə xəsarətlərə və dağıntılara səbəb olub.
Kiyev meri Vitali Kliçkonun bildirdiyinə görə, hazırda dörd zərərçəkən tibbi yardıma müraciət edib, onlardan üçü xəstəxanaya yerləşdirilib. Bir qədər sonra o, zərərçəkənlərin sayının 5-ə çatdığını açıqlayıb.
Kiyevin Qoloseyevski rayonunda yanğın baş verib. İlkin məlumata görə, yanğın avtomobillərə texniki xidmət stansiyasında qeydə alınıb. Obuxov rayonunda icmalardan birinə məxsus kommunal müəssisənin binası zədələnib.
Kiyev Vilayət Dövlət Administrasiyasından verilən məlumata görə, Rusiya məqsədli şəkildə kritik infrastruktur obyektlərini və yaşayış evlərini hədəfə alıb. Hücum nəticəsində bir nəfər yaralanıb.Belə ki, hücum zamanı yük avtomobilini idarə edən İvano-Frankivsk vilayətinin sakini bel nahiyəsindən qəlpə yaraları alıb. Yaralı yerli xəstəxanaya yerləşdirilib.
Eyni zamanda, Vışqorod şəhərində çoxmərtəbəli binanın pəncərələri zədələnib. Digər vilayətlərdə də dağıntılar qeydə alınıb.
Borispol rayonunda istehsal müəssisəsinin binalarına və iki avtomobilə ziyan dəyib. Buça rayonunda tikinti sahəsinin ərazisində yanğın baş verib. Obuxov rayonunda isə icmalardan birinə məxsus kommunal müəssisənin binası zədələnib. Hücumlar davam edir. Monitorinq mənbələrinin məlumatına görə, paytaxta doğru təxminən 70 pilotsuz uçuş aparatı hərəkət edir.
