Bildiyimiz kimi, buraxılış imtahanlarında ingilis dili fənni üzrə dinləmə, oxu (mətnlə iş) və 100 sözə artırılan esse tapşırıqları tətbiq olunur.

Redaktor.az-a danışan elm və təhsil məsələləri üzrə mütəxəssis Ramin Nurəliyev bildirdi ki, müasir təhsillə bağlı hər bir yenilik təqdirəlayiq addım hesab edilməlidir.

"Dövlət İmtahan Mərkəzi hər hansı bir yenilik tətbiq edərkən mütləq şəkildə abituriyentləri də düşünməlidir. Eyni zamanda həmin abituriyentlərin orta ümumtəhsil məktəblərində keçdikləri dərslər də diqqət mərkəzində olmalıdır".

Mütəxəssis əlavə etdi ki, burada bir neçə mühüm məqamı nəzərdə saxlamaq lazımdır:

"Birincisi, vaxt məsələsinə xüsusi diqqət yetirilməli və vaxtın artırılması təmin olunmalıdır. Məsələn, dinləmə tapşırıqları, mətn testləri və ya yazı (esse) tapşırıqları tərtib edilirsə, bunların hər biri üçün adekvat vaxt müəyyənləşdirilməlidir.

İkincisi, nəzərə almaq lazımdır ki, orta ümumtəhsil məktəblərində bu tip tapşırıqlar hansı səviyyədə yerinə yetirilir. Bu tapşırıqlar ümumiyyətlə yerinə yetirilirmi, hansı formada yerinə yetirilir və mövcud səviyyə qəbul imtahanları üçün kifayət edirmi? Bütün bu suallar nəzərə alınaraq müvafiq qərarlar verilməlidir. Lakin bəzi hallarda müşahidə edirik ki, kor-təbii şəkildə “gəlin çətinləşdirək” yanaşması tətbiq olunur. Nəticədə imtahan prosesi istər-istəməz çətinləşir və bu da buraxılış imtahanlarının mart ayına çəkilməsinə gətirib çıxarır. Bunun səbəbi isə çətinləşdirilmiş imtahanların yoxlama prosedurunun daha çox vaxt aparmasıdır. Yoxlama prosesinə üç-dörd həftə vaxt sərf olunur və bu da digər imtahanlarla toqquşmanın qarşısını almaq üçün buraxılış imtahanlarının daha erkən tarixə salınmasına təsir göstərir. Əlbəttə, biz hamımız Dövlət İmtahan Mərkəzinin yeni layihələrini dəstəkləyirik. Çünki məqsəd müasir tələblərə cavab verən imtahan modelini formalaşdırmaqdır və bu, təqdirəlayiq yanaşmadır. Beynəlxalq imtahan təcrübəsinə baxdıqda da oxşar imtahan formatlarının tətbiq olunduğunu görürük".

Müsahibimizin fikrincə, biz yenilik edərkən ilk növbədə öz reallıqlarımıza baxmalıyıq.

"Yəni orta ümumtəhsil məktəblərində şagirdlərə kifayət qədər mətn tapşırıqları, esse yazıları və dinləmə tapşırıqları verilirmi? Bu, qəbul imtahanları üçün yetərlidirmi? Hər bir məktəbdə, xüsusilə ingilis dili fənni üzrə bu tapşırıqları həyata keçirmək üçün maddi-texniki baza mövcuddurmu? Bu dərslər tədris olunursa, hansı səviyyədə tədris olunur? Əgər bir neçə məktəbi gəzib baxsaq, görərik ki, ən azı on məktəbdən üç-dördündə bu imkanlar məhduddur. Xüsusilə region məktəblərində bu problem daha qabarıq şəkildə özünü göstərir. Məncə, bütün bu amillər mütləq şəkildə nəzərə alınmalıdır", - deyə Ramin Nurəliyev yekunlaşdırdı.