2024-cü ilin sentyabr ayında İsmayıllı rayonunda həyata keçirilən istintaq-əməliyyat tədbirləri bir daha göstərdi ki, yerli icraetmə və bələdiyyə strukturlarında rüşvət və qanunsuzluq sistemli xarakter daşıyır. Tikinti işlərinin aparılması və torpaq sahələrinin icarəyə verilməsi adı altında vətəndaşlardan pul tələb etməkdə şübhəli bilinən vəzifəli şəxslər həbs edilib.Söhbət İsmayıllı Rayon İcra Hakimiyyəti başçısının İsmayıllı şəhər inzibati ərazi dairəsi üzrə nümayəndəsi Əlişir Süleymanovdan və Diyallı bələdiyyəsinin sədri vəzifəsini icra edən sədr müavini Cahangir Surxayevdən gedir.
İstintaq materiallarına görə, Əlişir Süleymanov şəhər ərazisində yerləşən qeyri-yaşayış sahələrində aparılan tikinti işlərinə süni maneələr yaratmaqla, bu maneələrin “aradan qaldırılması” və işlərin davam etdirilməsinə himayədarlıq göstərilməsi müqabilində ayrı-ayrı şəxslərdən müxtəlif məbləğlərdə rüşvət tələb edib və alıb.
Digər tərəfdən, Cahangir Surxayevin kənd təsərrüfatı təyinatlı torpaq sahəsini saxta sənədlər yolu ilə icarəyə vermək müqabilində müraciət edən şəxsdən hissə-hissə olmaqla külli miqdarda pul vəsaiti almasına əsaslı şübhələr müəyyən olunub.
Amma bir sual açıq qalır, rayon icra hakimiyyətinin şəhər üzrə nümayəndəsi və bələdiyyə rəhbərliyi uzun müddət ərzində rüşvət mexanizmi qurubsa, bu proses icra başçısının nəzarətindən kənarda necə baş verə bilər, icra nümayəndəsi icra başçısının birbaşa tabeliyində olduğu halda, onun fəaliyyəti hansı əsasla “görünməz” olub?
Mediatv.az xəbər verir ki,İsmayıllı rayonunda tikinti və torpaq məsələləri ətrafında formalaşmış rüşvət mexanizmi ilə bağlı artıq iki vəzifəli şəxsin həbs edilməsi bir həqiqəti açıq şəkildə ortaya qoyur, bu ani və təsadüfi cinayət deyil, davamlı və sistemli özbaşınalıqdır.İcra hakimiyyətinin şəhər üzrə nümayəndəsi birbaşa icra başçısının tabeliyindədir. Tikinti işlərinə süni maneələr yaradılması, “himayədarlıq” müqabilində rüşvət alınması aylarla, bəlkə də illərlə davam edibsə, bu, icra başçısının nəzarət mexanizmlərinin ya tam iflas etdiyini, ya da bilərəkdən işlədilmədiyini göstərir.Əgər Nahid Bağırov doğrudan da bu rüşvət sxemindən xəbərsiz olubsa, o zaman sual yaranır: Niyə rayon üzrə tikinti və torpaq sahəsində baş verənlərə real nəzarət etməyib,niyə tabeliyində olan şəxslərin fəaliyyəti yoxlanılmayıb? Bu halda söhbət artıq rüşvətdən yox, vəzifə səhlənkarlığından və idarəetmə qabiliyyətsizliyindən gedir.

Şübhə doğuran başqa bir məqam: icra başçısının təhsili
Nahid Bağırovun rəsmi bioqrafiyasında, o cümlədən Vikipediya səhifəsində göstərilir ki, o, 1999-cu ildə Azərbaycan Beynəlxalq Universitetinin Hüquq fakültəsini bitirib.
Ancaq ictimaiyyətə məlum faktdır ki, Azərbaycan Beynəlxalq Universiteti 1997-ci ildə yaradılıb.
Bu halda haqlı sual yaranır,universitetin yaranmasından cəmi iki il sonra hüquq fakültəsini bitirmək necə mümkün olub,bu təhsil hansı formada alınıb,qəbul imtahanı keçirilibmi,diplom hansı əsasla verilib?
Hüquq təhsili minimum 4–5 illik bakalavr proqramıdır. Bu müddət nə tədris planı, nə də dövlət standartları baxımından iki ilə sığmır.Nahid Bağırovun həmin ali məktəbi iki ilə bitiribsə deməli test imtahanından kənar yollarla qəbul olunub. Bu isə artıq sadəcə etik yox, qanuni suallar doğurur.Əgər bir rayon icra başçısının diplomu ilə bağlı bu qədər açıq ziddiyyətlər mövcuddursa və illərdir Nahid Bağırov tərəfindən heç bir açıqlama verilmirsə, deməli problem daha dərindir.Çünki icra başçısı sıradan məmur deyil. O, dövlət adından qərar verən, torpaq, tikinti, sahibkarlıq və vətəndaş hüquqlarına birbaşa təsir edən fiqurdur.
Qarşı tərəfin cavab haqqını tanıyırıq.
Mediatv.az