Deyilənə görə görkəmli şairimiz Bəxtiyar Vahabzadənin ətrafında fırlanan “yazar”lardan biri, günlərin birində onun şeirlərindən bəzilərini gizli toplayıb Qazaxıstanda öz adına kitab çap etdirir. Bundan xəbər tutan böyük şair həmin insanı məhkəməyə verib iyirmi min manat təzminat alır və bütün şairlərə tövsiyyə edir ki, ədəbiyyatımıza yaxşı xidmət etmək üçün ilk növbədə plagiatlığın qarşısını almaq və bunun üçün belələrinə qarşı ən sərt tədbirlər görmək gərəkdir...
Həmin olaydan on illərlə vaxt keçib. Sözügedən məhkəmədən isə əsər-əlamət qalmayıb. Dahi şairimizin qarşılaşdığı olayda məhkəmə onun iddiasını təmin etsə də, çağdaş şairimiz Yaqub Məğrurun başına gələn oxşar olayda məhkəmə onun iddiasını təmin etməyib. Bu dəfə şairin qarşısına çıxan şarlatan onu elə bir labirintə salıb ki, artıq dörd aydır ki, hüquq çıxılmazlığında fırlanır. Məsələ isə belə olub:
17 oktyabr 2023-cü il tarixdə Y.Məğrurun kompüterində nasazlıq yaranıb. Həmin anda hirslənmiş şairin kabinetinə daxil olan tanışı Fariz Məhərrəmov nə olduğunu soruşub. Şair kompüterin sürətinin çox zəiflədiyini və bu səbəbdən çapa hazırladığı növbəti kitabında dərc ediləcək materialları yekunlaşdırmağın gecikdiyini bildirib. “Azərbaycan” nəşriyyatının ikinci mərtəbəsində yerləşən “Qazilər” qəzeti redaksiyasında saxta dizayner fəaliyyəti göstərən F.Məhərrəmov özünü proqramçı kimi təqdim edərək, onun kompüterini elə öz kabinetində format edəcəyinə söz verməklə şairi şirnikləndirib. Ona inanan şair razılaşıb. Nəsə axtarırmış kimi ciblərini qurdalayan Fariz, öz fləş kartını hardasa unutduğunu bildirib və kompüteri format etməyə lazım olan proqram fayllarını yükləyib gətirmək üçün şairin fləşini istəyib. Bundan imtina edən şair bildirib ki, kompüterin yaddaşında olan bütün faylları öz fləş kartına yükləyib və silinməsindən ehtiyat edir. Fariz isə onu arxayın salıb ki, “narahat olma, silinməz!” Farizə inanan şair şəxsi fləşini ona verib. Ofisi tərk edən Fariz həmin gün geri qayıtmayıb. Bundan narahat olan şair həmin gün ona səkkiz dəfə zəng etsə də, cavab ala bilməyib. Yalnız iş vaxtı bitəndə son zəngə cavab verən Fariz bildirib ki, “indi sərxoşam, həm də gecdir, sabah gəlib kompüterini format edəcəm.” Növbəti gün Fariz redaksiyaya gəlib. Şairin dünən apardığı fləşini cibindən çıxarıb kompüterə taxıb. Günortayadək nə qədər çalışsa da, nəticə hasil edə bilməyib. Hansısa kompüter mütəxəssisinə zəng edərək kömək istəyib. Ancaq yenə heç nə alınmayıb. Nahar fasiləsi ərəfəsində, “nahardan sonra mütəxəssis gətirəcəm, format eləsin”- deyən Fariz ofisi tərk edib və bir daha geri qayıtmayıb. Bir neçə gün ərzində şair dəfələrlə zəng etsə də, Fariz telefonu aşmayıb. Çarəsiz qalan şair soraqlaşıb başqa proqramistə müraciət etməli olub. Həmin proqramist redaksiyaya gəlib və kompüteri format etmək üçün öz iş yerinə aparıb. Növbəti gün kompüteri sazlayandan sonra, nahar fasiləsi zamanı redaksiyaya gətirib və Y.Məğrura təqdim edib. Kompüterin saz və sürətlə işlədiyini görən şair sevinə-sevinə ustanın zəhmət haqqını ödəyərək yola salıb. Nahardan sonra şair formatdan öncə fləşinə köçürdüyü 2021-2023-cü illər ərzində yazdığı bütün qələm məhsullarının fayllarını kompüterə yükləmək məqsədilə fləşini kompüterə taxıb. Yalnız bundan sonra ona məlum olub ki, son iki il ərzində yazdığı və çapa hazırladığı növbəti kitabında dərc ediləcək 277 səhifəlik “Vicdan Yolçusu” romanı, 350 bənddən ibarət 50 səhifəlik “Rübailər və Aforizmlər”i, 25 səhifəlik digər şeir və “Kreativ Düşüncələr”i fləşin yaddaşından silinib. Hirslənən şair dərhal kompüterini sazlayan ustaya zəng edib və yenidən redaksiyaya gəlməsini xahiş edib. Usta da redaksiyaya qayıdıb və özü ilə gətirdiyi xüsusi cihazla fləşin yaddaşını yoxlayıb. Məlum olub ki, Fariz format üçün proqram fayllarını şairin fləşinə yükləyərkən, onu “Bolt” proqramında format diskinə çevirdiyinə görə öncəki materialların hamısı silinib. Mütəxəssis nə qədər çalışsa da, sözügedən materialları bərpa edə bilməyib. Bundan qəzəblənən şair faktla əlaqədar Yasamal rayon polis idarəsinə şikayət edib. Yasamal RPİ-nin təhqiqatçısı Nail Bayramlı şikayət ərizəsinə cavab olaraq çıxardığı qərarda bildirib ki, “...ərizənizdə fakt üzrə cinayət tərkibi olmadığına görə F.Məhərrəmova cinayət işinin açılması rədd edilir. Odur ki, mülki işlə əlaqədar məhkəməyə müraciət edə biərsiniz”. Bu qərarı əldə əsas tutan şair, F.Məhərrəmovun yaşayış yeri üzrə Binəqədi rayon məhkəməsinə “Dəymiş mənəvi ziyanın ödənilməsi barədə İddia Ərizəsi”lə müraciət edib. Hakim Günel Abbasovanın sədrliyilə proses təyin edilib. 24.01.2024-cü il tarixdə keçirilən hazırlıq iclasında F.Məhərrəmov heç nəyi boynuna almayıb və hırıldaya-hırıldaya üzünü şairə tutub deyib ki, “bu prosesi uduzacaqsan. Sonra Apellyasiya şikayəti verərsən!” Hakim cavabdehin bu sözlərinə kəskin reaksiya vermək əvəzinə, hirslənməyi şairə irad tutub və prosesi təxirə salıb.
Nəhayət növbəti proses 19.02.2024-cü il tarixdə baş tutdu. Fariz prosesə gəlmədi. İddiaçı şairi və fakt üzrə şahidi dinləyən hakim, ona təqdim edilmiş kifayət qədər dəlil sübutlar olsa da, heç nəyi nəzərə almadan iddianı təmin etmədi. Hakim G.Məhərrəmova qanunsuz “Qətnamə”ni elan edəndən sonra, qəribə tərzdə üzünü iddiaçı şair Y.Məğrura tutub izah etməyə çalışdı ki, “cavabdeh F.Məhərrəmovın iş yerini müəyyən edə bilmədiyimizə görə onu cəzalandıra bilmərəm”. İddiaçı hakimin bu bəhanəsinə etirazını bildirəndə isə, Günel xanım ironiya ilə “Sizin Apellyasiya şikayəti vermək hüququnuz var”-deməklə məhkəmə zalını tərk etdi.
P.S-1. Bu yerdə saxtakar “dizayner-proqramist” F.Məhərromovun məhkəmə ərəfəsində dediyi “hara şikayət edirsən et, mənim elə yüksək səviyyəli tanışım var ki, onun bir zəngilə hakim mənim xeyrimə qərar çıxaracaq” və birinci proses zamanı dediyi “bu prosesi uduzacaqsan. Sonra Apellyasiya şikayəti verərsən” – ironiyaları öz təsdiqini tapmış oldu. Deməli “Od yanmasa, tüstü çıxmaz” məsəli elə-belə deyilməyib.
P.S-2. Sözügedən məhkəmə prosesinə müdaxilə edən yüksək çinli məmurun kimliyi barədə redaksiyamıza məlumat verən şəxsi MİNA Tv.az saytının qiymətli hədiyyəsi gözləyir.
P.S-3. Saxtakar "dizayner-proqramist" F.Məhərrəmovun şəklini də çap etdik ki, onun kimliyini hər kəs bilsin və daha heç kim şair Y. Məğrur kimi onun tələsinə düşməsin!
(mövzunun davamı olacaq)
MİNA Tv.az-ın Araşdırma Bürosu