NOVRUZ BAYRAMINIZ MÜBARƏK, DAĞLAR!
İllərdir düşmüşəm səndən aralı,
Dönüb ağuşunda qalaydım, dağlar!
Suyundan içəydim buz bulaqların,
Dərin xəyallara dalaydım, dağlar!
Qəlbimə dağ çəkib qaniçən yağı,
Düşmən əlindədir türkün oylağı.
Dadına çataydım Babəksayağı,
Yağını lərzəyə salaydım, dağlar!
Göz yaşı tökürəm hey için-için,
Kaş geri dönəydi didərgin köçün.
Gəlib vüsalına yetişmək üçün,
Tutulmuş yolları alaydım, dağlar!
Hicran alovunda yanan el kimi,
Tufan qopararam inan, yel kimi!
Qayıdış günündə coşan sel kimi,
Axıb qəm gölünə dolaydım, dağlar!
İnam yox dünyanı saran şər dinə,
Yalnız güvənirəm türkün mərdinə,
Birləşib tapaydıq çarə dərdinə,
Bir cəngi havası çalaydım, dağlar!
Yaşıl ormanların gözəl səfası,
Gül-çiçəyin min bir dərdin şəfası,
Şairin qəlbində sönməz vəfası,
Yenidən sakinin olaydım, dağlar!
Neynirəm ki, sənsiz dövləti, varı,
Çin ola Məğrurun əhdi, ilqarı!
Qismətim olsaydı son dəfə, barı,
Zirvəndə bir namaz qılaydım, dağlar!
Yaqub Məğrur
2018-ci il
