“Mən sevdiyim sənətlə yaşadım. Qiymət verildi yaxud verilmədi, məni istədilər yaxud istəmədilər bunlarla maraqlanmadım. Uğurlarımla yanaşı mənə badalaq gələnlər də oldu. Hamısına can sağlığı arzulayıram. Həyatdır, mənim də qismətim belə imiş yəqin. Qismətimdən küsmürəm. Doya-doya baxıram, fəxr edirəm ki, mən varam. 50 il teatrda çalışmışam. Bəxtimdən razıyam, narazı deyiləm. Öz arzularıma çatmaq qismətim olub. Neçə-neçə filmlərdə çəkilmişəm, tamaşalarda rol almışam. Həyatımdan razıyam, küsməmişəm. Mənim də bəxtimə belə yazılıb. Teatr rəhbərliklərinin mənə qiymət verməkləri onlar üçün çətin olub”

Bunu Moderator.az-a açıqlamasında tanınmış aktrisa, doğum gününü qeyd edən Məsumə Babayeva deyib. O daha sonra səhhətindən danışıb.

“Az qalmışdılar ayağımı kəssinlər, amma müalicə etdirdim, qoymadım. Ürəyimdən müalicə alıram. Şəkər xəstəliyinə tutulmuşam. Evin içində güc-bəla ilə yeriyirəm. Nevrpotoloqa apardı qızım məni, üstümə nə qədər xərc qoydu. Dərmanlar da bahadır. Hər şeyi sığorta ilə ediblər. Dövlət xəstəxanalarına yaxın düşmək olmur. Mən bu gün ölürəmsə növbəyə dayanmalıyam ki, 3 aydan sonra mənə baxsınlar?! Əlbəttə ki, mən özəl klinikaya gedəcəm. Damarlarım da nazikləşib, sistemləri də mənə vura bilmirlər” deyə aktrisa gileylənib.

Aktrisa bildirib ki, teatrda daim yaşlı, qocaman sənətkarlar çalışmalıdır.

“Bu gün teatrdan rəhbərlikdən heç kim mənimlə maraqlanmır, əlaqə saxlamır. Dekabr ayında İlham Əsədov gəlib hədiyyə gətirmişdi. Teatrın bəzi gənc aktyor-aktrisaları mənimlə danışırlar. Anar Seyfullayev, Simuzər Ağakişiyeva və bəzi aktyorlar yazır hərdən. Teatrdan çıxarıblar, çıxarıblar da. İnsan xəstələnəndən sonra heç kimə lazım olmur sən demə. Halbuki mən teatrdan çıxarılandan sonra xəstələndim. Məni yaşlı sayırlar. Efirdə gedən verilişlərdə də bar-bar bağırırlar ki, yaşlılar, yaşlılar. İndi istəsəm belə nə verilişlərə, nə də film və seriallara gedə bilmərəm. Yaxşı vaxtımda çəkilmişəm. Artıq həyatda özümü lazımsız sayıram. Qızımın xətrinə yaşayıram. Bu cür yaşamaq mənlik deyil. Qızım qulluğumda dayanır, amma onun da işləri, problemləri var axı. O olmasa mən ümumiyyətlə yaşamaram. Nəvəm deyir ki, mən sənə icazə vermirəm ki, öləsən. Onlar üçün yaşayıram. Adam sənətdə incidiləndə teatr üçün etdiyi fədakarlıqlar göz önünə gəlir. Gündə 5-6 dəfə tamaşa oynamışam. Kimisə əvəz etmişəm. İndi də səni saymırlar. Adama pis təsir etməz? Kim olsa ona pis təsir etməz ki? Mən teatrda müqavilədəyəm. Rollarıma cavan aktrisaları səhnəyə buraxırlar ki, mənə qonorar verməsinlər. Bu pul teatrın fondundan mənə verilir, kiminsə cibindən yox. Onlar bunu etməklə deyirlər ki, sənə ehtiyacımız yoxdur. Direktordur da. O gedəcək, başqası gələcək. O teatrda işləyə-işləyə neçə direktor yola salmışam. Hamısı gəlib mənə ilişib, sonuncusu da belə” deyə o bildirib.

"Dövlət xəstəxanalarına yaxın düşmək olmur..."

Moderator