“Dream Construction Company” MMC bir gündə üç tenderin qalibi olub. Tribunainfo.az xəbər verir ki, bu barədə satınalma portalında məlumat yerləşdirilib.
Belə ki, MMC-nin udduğu ilk tender Tovuz İcra Hakimiyyətinin elan etdiyi müsabiqə olub. Tovuz rayonunda yolların əsaslı təmirini həyata keçirəcək şirkətlə 669.831,96 manatlıq müqavilə imzalanıb.
Həmin şirkət Ağdam İcra Hakimiyyəti ilə də ortaq “dil” tapıb. Məlum olub ki, “Dream Construction Company” Xındırıstan kəndi ərazisində abadlıq və yaşıllaşdırma işlərinin görülməsini həyata keçirəcək və buna görə, 275.935,92 manat alacaq.
Daha bir tender isə Ağcabədi İcra Hakimiyyəti keçirib. Rafil Hüseynovun rəhbəri olduğu rayonda İcra Hakimiyyətinin inzibati binasında abadlıq işləri görüləcək. Bununla əlaqədar 61.933,6 manatlıq müqavilə bağlanıb.
“Dream Construction Company” MMC kimindir və kimlərə məxsudur? Bu şirkətlə bağlı apardığımız qısa araşdırma zamanı məlum olub ki, “Dream Construction Company” nəinki bu üç rayonda, ölkənin əksər şəhər və rayonlarında tenderlərin qalibi olub. Əsasən abadlaşdırma və yol tikintisini həyata keçirən şirkətin kiçik məbləğli tenderlərlə isə işi olmayıb. Elə Ağcabədi İcra Hakimiyyəti ilə ötən ilin yayında avtomobil yollarının əsaslı təmiri işləri ilə bağlı 543.395,56 manatlıq müqavilə də bunu deməyə əsas verir. Həmçinin Sumqayıtda 2 milyonluq yol çəkmə, Xızıda 542 minlik abadlıq işləri də bura daxildir.
Dövlət Vergi Xidmətinin reyestr məlumatlarına əsasən, “Dream Construction Company” MMC 20 may 2014-cü ildə qeydiyyata alınıb. Nizamnamə kapitalı 5515 AZN olan şirkətin hüquqi ünvanı Bakı şəhəri Nizami rayonu, Heydər Əliyev prospekti, ev 152-də yerləşir. MMC-nin qanuni təmsilçisi İbrahimova Zəhra Musa qızıdır.
Apardığımız araşdırmaları zamanı məlum oldu ki, “Dream Construction Company” MMC əvvəllər “Otaxlı” MMC adı ilə fəaliyyət göstərib. 2022-ci ildə isə şirkətin adı dəyişdirilib. MMC-nin ilk qanuni təmsilçisi Hacıyev Mövlan Nəqşibəndi oğlu olub. Onu Abbasov Xıdır Pirverdi oğlu əvəzləyib. Xıdır Abbasovdan sonra isə şirkətin rəsmi təmsilçiliyi Zəhra İbrahimovaya keçib.(Tribunainfo.az)